Belgiyaga samolyotlar kirishi va chiqishi cheklandi

Bugun, 30 yanvar kuni Belgiya havo hududi mamlakat havo harakatini boshqarish tizimidagi texnik nosozlik tufayli yopildi. Bu haqda VRT xabar berdi.

Nashrga ko‘ra, nosozlik mamlakat havo hududi va aeronavigatsiya infratuzilmasini nazorat qilish uchun mas’ul bo‘lgan Skeyes kompaniyasi tizimida yuz bergan. Kompaniya matbuot kotibi Kurt Vervilligenning so‘zlariga ko‘ra, mahalliy vaqt bilan taxminan 15:00 da Skeyes tizimi “ishlamayotgani” qayd etilgan. O‘sha paytda Belgiya havo hududida bo‘lgan barcha samolyotlar qo‘shni mamlakatlarga yo‘naltirilgan. 

“Nosozlik sababi aniqlanmoqda”, deyiladi xabarda. 

Ma’lum qilinishicha, hozirda hech qanday reyslar Zaventem, Ostende, Antverpen, Sharlerua va Lej aeroportlariga qo‘na olmaydi yoki u yerda uchib keta olmaydi.

Bryussel aeroporti ham o‘z navbatida butun mamlakat bo‘ylab parvozlarni jo‘natish mumkin emasligini e’lon qilgan. 

“Havo harakatini boshqarish tizimidagi texnik nosozliklar tufayli hozirda Belgiyada havo qatnovi yo‘q”, deyiladi aeroport X ijtimoiy tarmog‘idagi xabarda.

Aniqlik kiritilishicha, hozirda aeroport rahbariyati havo hududining qancha muddatga yopilgani to‘g‘risida ma’lumotga ega emas.