Байден Мирзиёевга табрик мактуби йўллади

Америка Қўшма Штатлари Президенти Жозеф Байден Ўзбекистон Республикаси Президенти Шавкат Мирзиёевга Наврўз байрами муносабати билан табрик мактуби йўллади. 

“Америка халқи номидан Сизга ва Ўзбекистон халқига Наврўз айёми муносабати билан энг эзгу тилакларимизни йўлламоқдаман”, деб бошланган Байденнинг мактуби.

У ўтган йил давомида Ўзбекистон ва Америка Қўшма Штатлари умумий муаммоларни ҳал қилиш, халқлар хавфсизлиги ва фаровонлигини таъминлаш мақсадида бирлашганини қайд этган. 

“Ушбу уйғониш ва янгиланиш мавсумида Қўшма Штатлар Ўзбекистон халқига содиқлигини яна бир бор тасдиқлайди. Шу кунларда янги марраларни белгилаб, мустаҳкам тинчлик ва ўзаро англашув руҳидаги умумий келажак сари саъй-ҳаракатларимизни давом эттирар эканмиз, мен мамлакатларимиз ўртасидаги стратегик шериклик ва халқларимиз дўстлиги янада мустаҳкамланишига ишонаман”, деган АҚШ раҳбари.