“Барселона” Пересни судга бермоқчи

“Барселона” клуби “Реал Мадрид” президенти Флорентино Переснинг Испания Қироллик Футбол Федерацияси (RFEF) техник ҳакамлар қўмитасининг собиқ вице-президенти Энрикес Негрейра иши бўйича берган баёнотлари юзасидан судга мурожаат қилиш имкониятини кўриб чиқаётганини маълум қилди. Бу ҳақда клуб матбуот хизмати хабар берди.

Аввалроқ, Перес матбуот анжуманида “Реал Мадрид” Негрейра иши бўйича UEFA’га 500 саҳифалик мурожаат тайёрлаётганини билдирган эди. У, шунингдек, Негрейранинг ҳаракатлари нафақат “Реал Мадрид”га, балки бошқа клубларга ҳам зарар етказганини таъкидлаб, “Барселона” ҳар доим ҳакамлар қарорларидан фойда кўрганини айтган. Переснинг фикрича, унинг раҳбарлигидаги “Реал Мадрид” амалда 14 марта Испания чемпиони бўлиши керак эди, бироқ айрим унвонлар “ўғирланган”.

Бунга жавобан “Барселона” баёнот бериб, клубнинг юридик бўлими Переснинг сўзлари ва айбловларини ўрганаётганини билдирди. Клуб ҳозирча кейинги ҳуқуқий қадамлар кўриб чиқилаётганини, зарурат туғилса расмий чоралар кўрилишини маълум қилган.

2023 йил февралида оммавий ахборот воситаларида “Барселона” 2016–2018 йиллар оралиғида Негрейрага ҳакамлар ҳисоботлари учун тахминан 1,4 миллион евро тўлагани ҳақида хабарлар тарқалган эди. Кейинчалик прокуратура клуб 2001–2018-йиллар давомида унга 7 миллион евродан ортиқ маблағ ўтказганини билдирган.

2023 йилда “Барселона” порахўрликда айбланган, бироқ 2024 йил май ойида айрим айбловлар бекор қилинган. Негрейра эса ўз навбатида у фақат клубга ҳакамлар бўйича маслаҳат берганини айтган.

2025 йил октябрь ойида “Барселона” расман суд жараёнида гумонланувчи сифатида чақирилгани ҳақида хабарлар чиққан, декабрь ойида эса “Реал Мадрид” ушбу иш бўйича “Барселона”га қарши катта миқдордаги даъво қўзғатишни кўриб чиқаётгани айтилган.