Бьелса Уругвай терма жамоасидан кетишини эълон қилди

Уругвай терма жамоаси бош мураббийи Марсело Бьелса 2026 йилги Жаҳон чемпионатидан сўнг истеъфога чиқишини эълон қилди. Бу ҳақда “Globo” хабар берди. 

“Миллий терма жамоадаги ишим Жаҳон чемпионатидан кейин якунланади. Ҳар қандай профессионал учун Жаҳон чемпионатида иштирок этиш спорт фаолиятидаги мўъжизадир. Менга Жаҳон чемпионати каби мусобақада қатнашиш имконини бергани учун Уругвайдан абадий миннатдор бўламан”, дейди Бьелса.

70 ёшли Бьелса 2023 йил май ойидан буён Уругвай терма жамоасини бошқариб келмоқда. Унинг раҳбарлиги остида жамоа 33 та ўйин ўтказиб, 16 та ғалаба, 10 та дуранг ва 7 та мағлубият қайд этган. Бунгача Бьелса Англиянинг “Лидс Юнайтед”, Франциянинг “Лилль” ва “Марсель”, Италиянинг “Лацио”, Испаниянинг “Атлетик” клублари, шунингдек Чили ва Аргентина терма жамоаларини ҳам бошқарган.

Жаҳон чемпионати жорий йилнинг 11 июндан 19 июлга қадар АҚШ, Канада ва Мексикада бўлиб ўтади. Унда Уругвай “H” гуруҳида Кабо-Верде, Саудия Арабистони ва Испанияга қарши майдонга тушади.