Айрим давлат буюртмаларига оид маълумотлар мажбурий эълон қилинади

Жамият 2856
image

2023 йил 1 январдан бошлаб давлат ижтимоий буюртмасига оид маълумотлар мажбурий тартибда эълон қилиб борилади. Бу ҳақда Вазирлар Маҳкамасининг “Ижтимоий шериклик ҳамда жамоатчилик назоратини амалга ошириш механизмларини янада такомиллаштириш чора-тадбирлари тўғрисида”ги қарорида белгиланган.

Қарорга кўра, 2022 йил 1 декабргача e-ngo.uz электрон порталида ижтимоий шериклик ва жамоатчилик назоратини амалга оширишнинг қуйидаги механизмлари жорий этилади:

•  нодавлат нотижорат ташкилотлар (ННТ) томонидан дастурлар ишлаб чиқишда қатнашиш, уларнинг ижросини мониторинг қилиш, мониторинг натижаси бўйича кўриб чиқилиши мажбурий бўлган ҳужжатни, қонунчилик ҳужжатлари лойиҳаларига оид таклифларни масъул давлат органларига киритиш;

•  ННТларнинг дастурлар юзасидан берган таклифларини кўриб чиқиш натижаларини электрон порталга жойлаштириш;

•  ННТларнинг жамоатчилик назорати якунлари бўйича тайёрлаган ҳужжатларини давлат органларига юбориш ва уларни кўриб чиқиш натижаларини эълон қилиш.

Шунингдек, 2023 йил 1 январдан қуйидагилар давлат органлари ва ташкилотлари томонидан электрон порталга мажбурий жойлаштирилади:

•  ижтимоий ва иқтисодий дастурларнинг лойиҳалари;
•  лойиҳаларни амалга ошириш учун ННТларга давлат ижтимоий буюртмасини беришга оид эълонлар;
•  келгуси йил учун жамоат фондларига юбориладиган буюртманомалар;
•  давлат ижтимоий буюртмаси натижалари, маблағларнинг сарфланиш ҳолати.

Маълумот учун, мазкур электрон портал Адлия вазирлиги томонидан нодавлат нотижорат ташкилотларига онлайн хизмат кўрсатиш мақсадида ишлаб чиқилган.

Юлдуз Абдурашидова
Мақолага баҳо беринг
Баҳолаганлар: 36
Рейтинг: 3
t
×