“Арсенал”нинг чемпионлик парадида 1 млн мухлис қатнашди

Лондонда “Арсенал” футбол клубининг чемпионлик парадини 750 мингдан 1 миллионгача мухлис томоша қилди. Бу ҳақда “The Guardian” нашри хабар берди.

Манбага кўра, Англия Премьер-лигаси чемпионларини олиб ўтган очиқ автобуснинг тахминан 9 километрлик йўналиши бўйлаб шунча одам тўпланган.

Асосан қизил ва оқ футболка кийган одамларни дарахтлар, автобус бекатлари ва кўча чироқлари устида ҳам кўриш мумкин бўлган.

Ислингтон ҳудуди бўйлаб ўтган парад тахминан икки ярим соат давом этди. Бироқ тадбир якунланганидан бир неча соат ўтгач ҳам мухлислар кўчаларда ғалабани нишонлашни давом эттирган. Айрим ҳолатларда жамоат тартиби бузилиб, тўқнашувлар ҳам қайд этилган.

Скотленд-Ярд маълумотига кўра, 16 киши ҳибсга олинган, уларнинг олтитаси полиция ходимларига ҳужум қилгани учун ушланган. Шунингдек, бир киши пичоқланиб, вертолётда шифохонага етказилган. Унинг ҳолати ҳозирча номаълум.

Пойтахт клубининг ушбу чемпионлиги 2003-2004 йилги мавсумдан кейинги илк муваффақият бўлди. Бу “Арсенал”нинг Англия чемпионатидаги 14-ғолиблиги бўлиб, клуб бу кўрсаткич бўйича “Манчестер Юнайтед” ва “Ливерпуль”дан кейин учинчи ўринда туради.

Маълумот учун, клуб бош мураббийи, испаниялик мутахассис Микель Артета 2019 йилдан бери жамоани бошқариб келмоқда. Унинг қўл остида клуб 2020 йилда Англия Кубоги ҳамда 2020 ва 2023 йилларда Лига Кубоги совринларини қўлга киритган.