Аргентина Россия учун “туғилиш туризми”ни тўхтатмоқчи

Аргентина Россиядан бўлаётган “туғилиш туризми”ни тўхтатиш учун миграция сиёсатини қайта кўриб чиқди. Бу ҳақда мамлакатнинг Россиядаги элчиси Энрике Игнасио Феррер Виейра РБК'га берган интервьюсида айтиб ўтди.

Энди фуқароликни олиш учун 18 ёшдан ошган чет эл фуқароси Аргентинада қонуний яшаш жойи ва камида икки йил истиқомат қилганини исботлаши керак.

Дипломатнинг сўзларига кўра, Россия билан визасиз келишув “россиялик аёллар Аргентинага бориб, чегарада қоринларини яшириши учун эмас, балки маданий ва сайёҳлик алмашинуви учун тузилган”.

Илгари фуқаролик автоматик равишда мамлакатда туғилган болага, ота-онага эса оилани бирлаштириш тартиби орқали берилар эди. Бироқ, Россиянинг Украинага қарши уруши фонида бундай ҳолатлар сони кескин ошган. Шундай қилиб, 2023 йилнинг февраль ойида расмийлар бир кунда чегарани кесиб ўтган 83 нафар россиялик аёлдан 16 нафари ҳомиладорликнинг кеч босқичида бўлганини маълум қилди. 2022 йилда Аргентинага 5800 га яқин ҳомиладор россиялик аёл кирган.

Умуман олганда, расмий маълумотларга кўра, 2022 йилдан 2023 йилгача мамлакатга 23 мингдан ортиқ Россия фуқаролари борган. 2023 йилдаёқ россиялик ҳомиладор аёлларга оммавий равишда кириш тақиқлана бошланган.

Маълумот учун, кўпгина давлатларда (айниқса, АҚШ ва Канада) агар бола ўша давлат ҳудудида туғилса, у давлат автоматик равишда болага фуқаролик беради. Шунинг учун баъзи ота-оналар болаларининг келажаги учун қулай шароит яратиш ниятида (таълим, тиббиёт, ишлаш имкониятлари, виза олиш осонлиги ва ҳ.к.) у ерга бориб туғишни афзал кўради.