Анқарада содир бўлган ЙТҲда Президентнинг ўғли оғир жароҳат олди

Туркия пойтахти Анқаранинг Гўлбоши туманида Судан Президенти Абдулфаттоҳ ал-Бурҳоннинг ўғли Муҳаммад  ал-Бурҳон Раҳмон мотоциклда кетаётган вақтида йўл-транспорт ҳодисасига учради ва оқибатда оғир яраланди. Бу ҳақда кеча, 7 март куни "Haberler" нашри маълум қилди.

Воқеа кечки пайт Қизилчашар даҳасидаги Кираз булварида содир бўлган. Раҳмон бошқариб кетаётган мотоцикл енгил автомобилга бориб урилиши оқибатида ЙТҲ содир бўлган. Автоҳалокатга учраган мотоцикл ағдарилиб кетган ва Раҳмон бир неча метр узоқликка отилиб тушган.

Воқеа жойига соғлиқни сақлаш ва полиция гуруҳлари етиб борган. Тез тиббий ёрдам ходимлари томонидан ўтказилган текширув чоғида оғир тан жароҳати олган Раҳмонга воқеа жойида биринчи тиббий ёрдам кўрсатилгач, у тез ёрдам машинасида Билкент шаҳар шифохонасига олиб кетилган. 

Қайд этилишича, автомобиль ҳайдовчиси қўлга олинган. Шифохонанинг жонлантириш бўлимига ётқизилган Раҳмоннинг аҳволи оғирлигича қолмоқда. Полиция терговга қадар текширув ишларини давом эттирмоқда.

Эслатиб ўтамиз, 2023 йилда Арманистон полициясининг “Қизил беретлилар” махсус кучлари Еревандаги оммавий акциялар давомида мамлакатнинг иккинчи президенти Роберт Кочаряннинг ўғли Левонни ҳибсга олган эди.