Андижонда машиналардан ўзишга уринган Nexia фура билан тўқнашди

Андижон вилояти Шаҳрихон туманида ўзидан олдиндаги автомобиллардан ўтиб кетишга уринган Nexia-3 қарама-қарши йўналишда келаётган юк машинасига урилди. Бу ҳақда вилоят Йўл ҳаракати хавфсизлиги бошқармаси хабар берди.

Қайд этилишича, бугун, 12 апрель куни Шаҳрихон тумани “Бегбачча” МФЙ ҳудудидан ўтган А-373 халқаро автомобиль йўлнинг 413-километрида Андижон-Шаҳрихон йўналиши бўйлаб Nexia-3 русумли транспорт воситаси ҳайдовчиси И.И. олдиндаги транспорт воситаларидан ўзиб кетмоқчи бўлган. У йўлнинг ўнг четки қисми томонида ҳаракатланган ва олдиндаги транспорт воситасига тегиб кетмаслик учун кескин тормоз бериш оқибатида бошқарувни йўқотган. Шундан сўнг Nexia-3 йўлнинг қарама-қарши томонидан келаётган IVECO русумли  юк транспорт воситасининг тиркамасини орқа чап томонига урилиб, йўл-транспорт ҳодисаси содир этган.
 
Билдирилишича, ушбу ЙТҲ оқибатида Nexia-3 русумли автомашинадаги йўловчи шилинма тан-жароҳатини олиб, шифохонага мурожаат қилган. Ҳозирда мазкур ҳолат юзасидан Шаҳрихон тумани ИИБ ЙҲХБ томонидан суриштирув ишлари олиб борилмоқда.
 
Эслатиб ўтамиз, аввалроқ Қорақалпоғистон Республикаси Тўрткўл туманида Isuzu юк автомобили DAF русумли юк автомобилининг орқасига урилганди. Кабина ичида қолиб кетган Isuzu ҳайдовчиси қутқарилган.