Андижонда 13 ёшли қиз билан жинсий алоқа қилмоқчи бўлган эркак жазоланди

Андижон вилоятида 37 ёшли эркак қўшнисининг 13 ёшли қизига пул эвазига жинсий алоқа таклиф қилган, унинг аёли эса бунда воситачи бўлган. Бу ҳақда “Сукут сақлама” лойиҳаси хабар берди.

Қайд этилишича, 2024 йил ноябрь ойида иш судда кўрилган. Судланувчининг гувоҳлигига кўра, 1987 йилда туғилган Б.О. рафиқаси билан бўлган интим эҳтиёжларини қондира олмаган ва унга қўшниси 2011 йилда туғилган М.ни олиб келишини айтган. Бироқ унинг сўзларига кўра, у ухлаб қолган ва кейин нима бўлганини эслай олмаган.

Вояга етмаган М. судда ўша куни қўшниси уни уйига олиб келиб, эри билан жинсий алоқада бўлишини айтганини маълум қилган. Аёл, шунингдек, ўсмир “ҳеч нарсани кўрмаслиги ва оғриқни ҳис қилмаслиги” учун кўзини боғлаб қўйишини айтган ва бунинг учун 50 минг сўм таклиф қилган. Қизча рад этгач, суҳбатга эркак аралашган ва агар у рози бўлса, 100 минг сўм тўлашини айтган. Қизча қўрқиб кетиб, қочиб кетган.

Вояга етмаган қизнинг онаси судда қизлари М. ва Р. унга қўнғироқ қилиб, М.ни қўшни эркак ўзининг жинсий эҳтиёжларини қондириши учун уйига олиб кетишганини айтган. Унинг қўшимча қилишича, тан жароҳати ёки зўравонлик ҳолати бўлмаганини, аммо шикоятни қаноатлантиришни сўраган. Унинг фикрича, эркак ва унинг рафиқаси ҳаракатларида жиноят белгилари бўлиши мумкин. Шу боис она биринчи инстанция судининг ҳал қилув қарорини бекор қилиб, иш материалларини прокуратурага юборишни сўраган.

Биринчи инстанция суди Б.О. ва унинг рафиқаси ҳаракатлари Маъмурий жавобгарлик тўғрисидаги кодекснинг 41−1-моддаси 1-қисми “Шаҳвоний шилқимлик” билан тўғри квалификация қилинган деб топган. Эркакка 5 сутка маъмурий қамоқ жазоси, хотинига эса давлат фойдасига 750 минг сўм жарима жазоси тайинланган.

Апелляция суди эса маъмурий жавобгарликка тортиш тўғрисидаги қарорни ўзгаришсиз қолдириб, жиноят ишини қўзғатиш зарурлиги тўғрисидаги аризага рози бўлмаган.

Эслатиб ўтамиз, аввалроқ Самарқанд вилоятида саккизинчи синф ўқувчиси бир гуруҳ шахслар томонидан ўғирлаб кетилган ва жинсий тажовуз қилинганди.