Алишер Усмоновга алоқадор компания “Kapitalbank”нинг ярмига эга чиқди

"Finance TCI" МЧЖ "Kapitalbank" АТБнинг мажоритар акциядорига айланди. Бу ҳақда банк томонидан Ягона корпоратив ахборот порталида маълумот қолдирилган. 

Finance TCI 2022 йил 28 декабрда биржа савдоларида банк устав капиталининг 50 фоизини ташкил қилувчи 214,4 млн дона оддий акциясини сотиб олган эди. Битим 786,89 млрд сўмга имзоланган ва бир дона акциянинг нархи 3670 сўмдан ҳисобланган.

Биржа маълумотларига кўра, "Kapitalbank"нинг 50 фоиз акцияси бир марта битим тузиш орқали сотилган. Ушбу миқдордаги акциялар Россиянинг Телекоминвест ширкатига тегишли. Битим натижасида рус ширкати банк акциядорлари сафидан чиққан бўлиши мумкин, деб ёзмоқда “Bankers.uz”.

Ҳозирда Finance TCI банкнинг 61,54 фоиз акцияларини назорат қилмоқда.

2022 йил январида ўша пайтда Алишер Усмоновнинг USM холдинги тузилмаларига тегишли бўлган компания банкнинг 8,33 фоиз улушига эга бўлди. USM'нинг шўъба корхонаси Телекоминвест 2021 йилнинг кузида банк акциядорига айланди, кейин эса ўз улушини кенгайтирди.

Январь ойи охирига келиб Усмоновга алоқадор компаниялар "Kapitalbank"нинг 58,33 фоизини назорат қилган.