Акаев Қирғизистонга қайтиб, Жапаровнинг сиёсати ҳақида гапирди (видео)

Бугун, 19 июнь куни Қирғизистоннинг биринчи президенти Асқар Акаев узоқ вақтдан бери илк бор мамлакатга қайтди ва Садир Жапаровга қўшимча президентлик муддати беришни таклиф қилди. Бу ҳақда “24.kg” хабар берди.

Нашр маълумотларига кўра, Қирғизистоннинг биринчи президенти Асқар Акаев республикага етиб келган ва Иссиқкўл юбилей халқаро форумида иштирок этмоқда. Шу билан бирга, аввалроқ эълон қилинган расмий иштирокчилар рўйхатида унинг исми йўқ. Форум Қирғизистонда 18 июндан 21 июнгача бўлиб ўтмоқда. 

“Асқар Акаев учун бу 2005 йилги воқеалардан кейин Қирғизистонга биринчи ташриф эмас. У 2005 йил 24 мартда, март инқилоби пайтида мамлакатни тарк этган ва ўша йилнинг 3 апрелида расман истеъфога чиққан.

2024 йилда Акаев “Қумтор” иши бўйича кўрсатма бериш учун Қирғизистонга келган эди. Ўшанда собиқ президент халққа мурожаат билан чиқиб, олтин кони лойиҳасини амалга оширишда йўл қўйилган хатолар учун халқдан узр сўраган эди”, дейилади хабарда.

“Kaktus.media” ахборотига кўра, Асқар Акаев чиқиши давомида Садир Жапаровга яна бир президентлик муддати беришни таклиф қилган. Унинг сўзларига кўра, мамлакат иқтисодиёти ўсмоқда ва “иқтисодий мўъжиза” режасини амалга ошириш учун камида 8-10 йил талаб этилади.

“Ordomedia” нашри Акаевнинг нутқидан олинган кадрларни эълон қилган. У халқ Садир Жапаровни қийин даврда сайлаганини, аммо бугунги кунда иқтисодиёт юксалаётганини, ижобий тенденциялар ижтимоий соҳада ҳам кўзга ташланаётганини айтган.

“Агар Қирғизистон халқи амалдаги президентга қирғиз иқтисодий мўъжизаси режасини амалга ошириш учун қўшимча мандат топширса, ҳар доимгидек донишмандлик билан иш тутган бўлади деб ҳисоблайман. Бунинг учун камида 8-10 йил керак бўлишини ўзингиз яхши биласиз”, дейди у.

Журналистларнинг мамлакатга бутунлай кўчиб келиши мумкинлиги ҳақидаги саволига жавоб берар экан, у агар қатъий таклиф бўлса, бундай вариантни кўриб чиқишга тайёрлигини маълум қилган.

“Агар қатъият билан таклиф қилишса, албатта. Чингиз Айтматов таъкидлаганидек, ватанда ўлиш керак”, дейди бириничи президент.

Маълумот учун, Асқар Акаев Қирғизистоннинг биринчи президенти. У мамлакатни 1990 йилдан 2005 йилгача бошқарган. 2005 йил 24 мартдаги “Лола инқилоби” оқибатида ҳокимиятдан ағдарилган ва мамлакатни тарк этган. Шундан буён у Россияда яшайди. 

Эслатиб ўтамиз, аввалроқ Асқар Акаев 2005 йил Қирғизистонда юз берган “Лола инқилоби”ни АҚШ уюштирганини даъво қилиб, давлат тўнтаришининг жуда арзонга тушганини айтган эди.