АҚШнинг ҳарбий ҳаракати Эронни босим остига қўймоқда – ОАВ

АҚШнинг ҳарбий кучларини Яқин Шарққа юбориши Эрон томонидан бевосита таҳдид сифатида қабул қилинмоқда. Бу ҳақда “Reuters” хабар берди.

Қайд этилишича, жорий йилнинг 19 январь куни АҚШ Ҳарбий-денгиз кучлари Малайзия ва Индонезия ўртасидаги Малакка бўғозига етиб келган. Ўтган ҳафта Осиё-Тинч океани минтақасини тарк этган USS Abraham Lincoln авиаташувчиси тезкор жанговар кемалар ва қирувчи самолётлар билан бирга Яқин Шарққа йўл олган. Ҳарбий гуруҳ Малакка бўғозидан ўтиб, яқин кунларда минтақага етиб келиши кутилмоқда.

Теҳрон бу ҳаракатни қўшимча босим сифатида баҳоламоқда. Мамлакат ичида давом этаётган намойишлар ҳукуматни заифлаштирган бир пайтда ташқи босимнинг кучайиши расмийларни янада таҳликага солмоқда. Шунингдек, Эрон Қуролли кучлари ҳимояга тайёр экани ва мамлакатда юқори даражадаги ҳарбий тайёргарлик ҳолати сақланаётгани очиқланган.

“Бу сафар биз ҳар қандай ҳужумни – чекланганми, чекланмаганми, аниқ ёки кинетикми – бизга қарши тўлиқ уруш сифатида кўрамиз ва энг кескин тарзда жавоб берамиз”, дейди эронлик мансабдор.

У АҚШдан доимий ҳарбий таҳдид борлигини билдирган. Шунингдек, республика ҳужумни қайтариш учун ўзида мавжуд барча воситаларни сафарбар қилишга мажбур эканини билдирган.

АҚШ Президенти Дональд Трамп эса Эрон томонга катта флотилия ҳаракатланаётганини айтган. У ҳозирча куч ишлатиш эҳтимоли аниқ эмаслигини билдирган. Бу баёнот муросага йўл очиши мумкин, бироқ ҳарбий кучларнинг минтақада тўпланиши вазиятни ноаниқ ҳолатда сақлаб турибди.

Трамп чиқишларида бир неча бор Эрон намойишчиларини қўллаб-қувватлашини айтган. У ҳукумат тинч намойишчиларни қаттиқ бостирса ва одамлар ҳалок бўлса, АҚШ ҳарбий куч ишлатиши мумкинлигини огоҳлантирган. Бир нечта ОАВ Оқ уй Эрон бўйича ҳарбий зарбалар ва кибирҳужум вариантларини муҳокама қилаётганини ёзмоқда. Эрон расмийлари эса бу баёнотларни “Америка фитнаси” деб атаб, рад этмоқда.

Суннатова Фарангиз