АҚШда Трамп тасвири туширилган танга чиқарилади

АҚШда мамлакат Президенти Дональд Трамп тасвири туширилган эсдалик тангаси чиқарилади. Нафис санъат комиссияси Оқ уйнинг амалдаги раҳбари тасвирланган танга дизайнини маъқуллаган. Бу ҳақда USA Today хабар берди.

Қайд этилишича, Президент Дональд Трампнинг портретини 24 каратли олтиндан тайёрланган эсдалик тангасида абадийлаштириш режалаштирилган.

Эсдалик олтин тангасида Оқ уйнинг бош фотографи томонидан олинган сурат акс эттирилган бўлиб, унда Трамп стол устига эгилиб турган ҳолатда тасвирланган. Дизайн кеча, 19 март куни маъқулланган.

Алоҳида равишда, Молия вазирлиги Трамп тасвири туширилган 1 долларлик танга чиқаришни режалаштираётганини маълум қилди. Унинг дизайни Нафис санъат комиссияси томонидан январь ойидаёқ маъқулланган эди.

Эслатиб ўтамиз, аввалроқ АҚШ ҳукумати бир центлик тангаларни зарб этишни тўхтатганди. Бу қарор пеннининг долзарблиги йўқолгани ва ишлаб чиқариш қимматга тушаётганлиги билан изоҳланган.