АҚШда отишма содир этган мактаб ўқувчисининг отаси ҳибсга олинди

АҚШнинг Жоржия штати расмийлари мактабда тўрт кишини отиб ўлдирган 14 ёшли ўсмирнинг 54 ёшли отаси Колин Грейсни ҳибсга олди. Бу ҳақда “Reuters” хабар берди.

Эркак ўғлига ҳужумда қўлланилган қуролни билиб туриб ундан фойдаланишга рухсат берганликда айбланмоқда. Ўсмирнинг отаси беихтиёр одам ўлдириш, иккинчи даражали қотиллик ва болаларга зўравонлик қилишда айбланган. 14 ёшли ўғли Кольт Грейс эса тўртта ўлим қотиллигида айбланмоқда.

Ота ва ўғил устидан суд жараёни бугун, 6 сентябрда бошланади. Жиноятнинг жиддийлигини инобатга олган ҳолда, Кольт вояга етганида судланади, бу АҚШда бундай ҳодисаларда одатий ҳолдир.

Нашрга кўра, отага қўйилган айбловлар Америкадаги мактаб отишмаларига қарши кураш бўйича янги стратегиянинг бир қисмидир. Масалан, апрель ойида мичиганлик ўсмирнинг ота-онаси ўғли тўрт синфдошини отиб ўлдиргани учун қотиллик айби билан 10 йилдан 15 йилгача қамоқ жазосига ҳукм қилинган эди. АҚШ Ички хавфсизлик департаменти томонидан ўтказилган тадқиқотга кўра, мактабда отишма содир этганларнинг 75 фоизи ўз ҳужумларида уйдан олиб қўйилган қуроллардан фойдаланган.

2023 йил май ойида полиция Колин ва Кольт Грейсни отишма содир этиш билан таҳдид қилганликда гумон қилиб сўроққа тутган. Ўшанда Грей интернетда мактабда отишма уюштириш билан таҳдид қилгани ҳақидаги аноним хабарлар юзасидан полиция томонидан сўроқ қилинган.

Маълумот учун, сўнгги 20 йил ичида Қўшма Штатларда мактаб ва коллежларда юзлаб отишма содир бўлди. Бу америкаликларнинг қурол сақлаш ва олиб юриш қонуний ҳуқуқи ҳақидаги баҳсларни кучайтирди. Негаки, қонун АҚШ конституциясининг иккинчи тузатишида мустаҳкамланган.

Эслатиб ўтамиз, жорий йилнинг 4 сентябрь куни АҚШнинг Жоржия штатидаги Апалачи ўрта мактабида 14 ёшли ўқувчи одамларни ўққа тутган эди.