АҚШ ҲАМАС ва Исроилга янги таклиф берди

Фаластиннинг ҲАМАС гуруҳи АҚШнинг Яқин Шарқ бўйича махсус вакили Стив Уиткофф томонидан Ғазо секторида ўт очишни тўхтатиш бўйича янги таклифни қабул қилди. Бу ҳақда ҳаракатнинг Telegram-каналида эълон қилинди.

Гуруҳнинг маълум қилишича, ҳозирда ушбу таклифни ўрганиш бўйича ишлар олиб борилмоқда.

“ҲАМАС раҳбарияти воситачилар орқали Стив Уиткоффдан янги таклиф олди ва уни халқимиз манфаатларига, фойдалилигига ҳамда Ғазода доимий ўт очишни тўхтатишни таъминлашига мувофиқлигини масъулият билан ўрганмоқда”, дейилади баёнотда.

ҲАМАС ҳаракати Стив Уиткофф билан ўт очишни тўхтатиш бўйича янги келишувга кеча, 28 май куни эришилганини маълум қилган. Худди ўша куни Уиткофф Оқ уйда журналистларга АҚШ тез орада Исроил ва ҲАМАСга ўт очишни тўхтатиш шартлари рўйхатини тақдим этишини билдирган.

Ynet порталининг хабар беришича, бугун, 29 май куни тонгда Исроил ҳам ушбу янги режани олган ва ҳозирда уни кўриб чиқмоқда.

• Янги таклиф қуйидагиларни ўз ичига олади:
• Ғазо секторида 60 кунлик ўт очишни тўхтатиш;
• 10 нафар тирик гаровга олинган асирни озод қилиш;
• 18 нафар ҳалок бўлганлар жасадини қайтариш;
• Бунинг эвазига Исроил тахминан 1 500 нафар фаластинлик маҳбусни озод қилиши керак бўлади.

Маълумот учун, май ойининг ўрталарида Исроил мудофаа кучлари (ЦАХАЛ) Ғазо секторида янги қуруқликдаги операция “Гидён араваси” бошланганини эълон қилди. “The Times of Israel” нашрининг ёзишича, ҳозирда Ғазо секторида ЦАХАЛнинг барча оддий пиёда ва зирҳли бригадалари жойлаштирилган. Нетаньяху Исроил Ғазо секторининг бутун ҳудудида ҳарбий назорат ўрнатиш ниятида эканини айтди. Ғазодаги оғир гуманитар вазият Европа Иттифоқини яҳудий давлати билан муносабатларини қайта кўриб чиқишга ундаган, Британия, Канада ва Франция эса санкциялар билан таҳдид қилган.

Эслатиб ўтамиз, аввалроқ бир нечта ОАВлар ҲАМАС ҳаракати АҚШ Президентининг махсус вакили Стив Уиткоффнинг Ғазо секторида ўт очишни тўхтатиш таклифига рози бўлгани ҳақида ёзганди.