АҚШ ва Европа Украинага нималарни ваъда қиляпти?

АҚШ ва Украина Россия билан тинчлик келишуви ва хавфсизлик кафолатлари асосида ҳужжатлар тайёрлашда давом этмоқда. Тинчлик режасида аллақачон 20 та асосий пункт тайёр. Бу ҳақда Украина Президенти Владимир Зеленский кеча, 22 декабрь куни дипломатия хизмати ходимлари билан учрашувда маълум қилди. 

Унинг таъкидлашича, асосий ҳужжат – хавфсизлик кафолатлари бўлиб, унда армияни қўллаб-қувватлаш бўйича давлатлар мажбуриятлари ва деталлари махфий иловада акс эттирилади. Шунингдек, Украина тикланиши учун урушдан кейинги келишув устида ҳам иш давом этмоқда.

Кейинроқ Зеленский ўзининг Telegram-каналида АҚШ ва Европа томонидан Украинага бериладиган хавфсизлик кафолатларини эълон қилди. Улар орасида:

• Қуролли кучлар учун моддий таъминлаш (қуролли кучлар сони 800 минг киши бўлиши керак);
• Европа Иттифоқига аъзолик;
• ҳаво, денгиз ва ерда хавфсизликни таъминлаш;
• энергетика, молия ва паноҳ масалаларида “истаганлар коалицияси” билан ҳамкорлик.

Зеленский АҚШ кафолатлари Европа кафолатларидан алоҳида бўлишини, қонуний бўлиши учун уларни АҚШ Конгресси тасдиқлаши кераклигини таъкидлади. Ҳужжат устида икки давлат вакиллари биргаликда ишлаган, бу эса “ҳақиқий натижага жуда яқинлигимизни” кўрсатади.

Кремль ҳали янги тинчлик режаси ва хавфсизлик кафолатлари бўйича изоҳ бермаган. Олдинроқ Россия Президенти ёрдамчиси Юрий Ушаков Украина ва Европа томонидан таклиф қилинган урушни тўхтатиш режаларини “натижа бермайди” деган эди.