АҚШ уриб туширилган вертолётга жавобан Эронга зарба берди

АҚШ ҳарбийлари бугун, 10 июнга ўтар кечаси Ҳормуз бўғози ҳудудида Apache вертолёти йўқ қилинишига жавобан Эронга зарбалар берди. Бу ҳақда АҚШ Марказий қўмондонлиги (CENTCOM) хабар қилди.

“Reuters”нинг вазиятдан хабардор манбасига кўра, ҳужум тахминан тўрт соат давом этган ва жами 20 га яқин объект нишонга олинган. “Fox News”нинг қайд этишича, Эроннинг радарлари ва ҳаво ҳужумидан мудофаа тизимлари асосий нишонга айланган.

“Fars” ҳам мамлакат жанубига берилган учта тўлқиндаги зарбалар ҳақида хабар берган. Шунингдек, Қешм оролида ҳам портлашлар қайд этилган. Бунга жавобан Эрон АҚШнинг Баҳрайн, Қувайт ва Иорданиядаги ҳарбий объектларига қарата ракеталар ва пилотсиз учиш дронларни учирган. 

“Reuters” манбасининг айтишича, уларнинг деярли барчаси ҳаво ҳужумидан мудофаа кучлари томонидан уриб туширилган. АҚШ расмийси CNN телеканалига берган баёнотида янги зарбалар Эронга қаратилган “огоҳлантирувчи ўқ” бўлиши назарда тутилганини айтган. Шу билан бирга, у бу ҳаракатлар урушни тугатиш бўйича музокараларга халақит бермаслигини алоҳида таъкидлаган.

Эслатиб ўтамиз, АҚШ ҳарбийларининг Apache вертолёти 8 июнь куни Ҳормуз бўғози ҳудудида патруллик қилаётган вақтда ҳалокатга учраган эди. Иккала учувчи ҳам омон қолишга ва хавфсиз жойга етиб олишга муваффақ бўлган.