АҚШ Украинани молиялаштиришни тўхтатмоқчи

АҚШ вице-президенти Жеймс Дэвид Вэнс Қўшма Штатлар Украинани молиялаштиришни тўхтатишини айтди. Бу ҳақда у “Fox News” телеканалига берган интервьюсида сўз очди.

Вэнс Трамп билан учрашувдан олдин Зеленский ва Путин ўртасидаги бевосита мулоқот деярли самара бермаслигини таъкидлаган. Унинг фикрича, айнан АҚШ Президенти икки давлат раҳбарларини бир стол атрофида тўплаб, келишмовчиликларни ҳал этишга қодир. 

“Биз, албатта, украиналиклар билан гаплашамиз. Мулоқот эшигини очиқ қолдирамиз. Аммо асосий тамойил шуки, Президент Трамп Путин ва Зеленскийни музокара столига ўтқазиб, уларнинг ўзаро келишмовчиликларни ҳал қилишга мажбур қилиши керак”, деган АҚШ вице-президенти. 

Унинг қўшимча қилишича, томонларнинг иккаласи ҳам музокаралар олиб бориш ва муросага боришдан “хурсанд бўлмаслиги” мумкин. Шунга қарамай, АҚШ бу шартларни ҳар икки мамлакат учун мақбул қилишга интилмоқда.

“Биз, албатта, юз берган босқинни қоралаймиз. Вазиятнинг шундай тус олганидан хурсанд эмасмиз. Лекин тинчликка эришиш керак. Тинчликка эришишнинг ягона йўли бу музокара столига ўтириб, гаплашишдир”, деган Вэнс. 

АҚШ вакили, шунингдек, Путин аввал Зеленский билан бир столга ўтиришни истамаслигини, аммо Трамп бу позицияни ўзгартиришга муваффақ бўлганини айтган.

Вэнсга кўра, Вашингтон ҳозир АҚШ, Россия ва Украина Президентлари учрашуви учун “уч томонлама саммит”нинг жадвали ва бошқа тафсилотларини ишлаб чиқмоқда, шунда уч етакчи можарони тугатиш масаласини муҳокама қила олади.

Қолаверса, вице-президент АҚШнинг Украинани молиялаштиришни тўхтатишини қўшимча қилган. 

“Биз Украинадаги урушни молиялаштиришни тугатяпмиз. Бу масалани тинч йўл билан ҳал қилишни истаймиз. Уруш Европанинг орқа ҳовлисида бўлаётгани учун бу ерда америкаликларга қараганда европаликлар каттароқ роль ўйнаши лозим, чунки америкаликлар ўз пулларини бу можаро учун узлуксиз юборишдан чарчади”, деган Америкалик расмий. 

Вэнс Трампнинг Хитойга қарши янги савдо божлари жорий этиш масаласини ҳам ўйлаётганини, бироқ “бу борада аниқ қарор қабул қилинмаганини” айтган.

Маълумот учун, Трамп Владимир Путин билан жорий йилнинг 15 август куни АҚШнинг Аляска штатида учрашиши режалаштирилган.

Эслатиб ўтамиз, аввалроқ АҚШ Президенти Дональд Трамп Украина раҳбари Владимир Зеленский “бирор нарсани имзолаши” кераклиги ва унга тайёр туриши шартлигини айтганди.