АҚШ Украинага махфий равишда ҳарбий машина юборган – “Forbes” 

Украина Америка Қўшма Штатларидан камида битта M1150 Assault Breacher миналарни тозаловчи энг кучли зирҳли машинасини олган, аммо бу расман эълон қилинмади. Бу ҳақда “Forbes” журнали хабар берди.

Қайд этилишича, Украина Қуролли кучлари  биттадан олтитагача шундай автомашинани олган бўлиши мумкин. Бироқ аниқ рақам номаълум. Нашр  кеча, 3 ноябрь куни Украина Президенти Владимир Зеленский девони сайтида чоп этилган фотосуратларга эътибор қаратган. Суратлардан бирида 55 тонналик Америка зирҳли машина тасвирланган. Унинг нархи 4 миллион доллар туради. Бироқ АҚШ ҳарбий ёрдамининг расмий рўйхатига Assault Breacher киритилмаган.

Маълумот учун, M1150 Assault Breacher – комбинацияланган автомобиль саналади. Ушбу техника тўрт метрли "пичоқ" билан жиҳозланган бўлиб, унинг ёрдамида машина миналанган майдонлардан ўтиши мумкин. Бироқ унинг асосий қуроли портловчи моддалар билан кабелларни улоқтирувчи қурилмадир. Машина ҳаракатланганида унинг кабели чўзилиб, мина майдонига тушади, шундан сўнг у портлайди. Бундай ҳолда, миналар ҳам портлайди ёки бир неча метрга ён томонларга учиб тушиб, хавфсиз ўтиш жойини ҳосил қилади.

Эслатиб ўтамиз, ўтган ҳафтада Германия Киевга аввалдан ваъда қилинган Leopard 1A5 танкининг яна 25 тасини етказиб берганди. Пентагон эса Украинага умумий қиймати 425 миллион доллар бўлган навбатдаги ҳарбий ёрдам пакетини тақдим этганди.