АҚШ Украинага ҳарбий ёрдам бўйича етакчиликдан воз кечди

Пентагон Украинага қурол-яроғ етказиб бериш ва Украина Қуролли кучлари аскарларини ўқитишни мувофиқлаштирувчи Украинага хавфсизликни таъминлашда кўмаклашиш гуруҳига (Security Assistance Group, SAG-U) бошчилик қилишни тўхтатади. Бу ҳақда Америка мулозимига ва АҚШ Уруш вазирлигининг (Пентагон) режаларидан хабардор уч кишига таяниб, “Politico” хабар берди.  

Уларнинг сўзларига кўра, гуруҳга НАТОнинг бошқа бир мамлакати бошчилик қилади. Айнан қайси давлат эканига аниқлик киритилмаган. Шу билан бирга, раҳбариятнинг алмашиши бир йилгача вақт олиши мумкин, бироқ манбалар бу гуруҳ ишини тўхтатиб қўймаслигини таъкидламоқда, чунки “Украинани қўллаб-қувватлаш энг устувор вазифа бўлиб қолмоқда”.

Пентагоннинг маълум қилишича, SAG-U бошиданоқ вақтинчалик тузилма сифатида режалаштирилган. Идора етакчиликнинг топширилиши “альянс ичида юкни қайта тақсимлаш” жараёнининг бир қисми экани ва Қўшма Штатларнинг янги мудофаа стратегиясига мос келишини билдирган. 

“Етакчиликнинг Европа ёки Канада офицерига топширилиши иттифоқчилар ўз зиммаларига кўпроқ масъулият олаётганининг яна бир мисоли бўлади”, дейди НАТО вакили. 

Раҳбарият алмашгандан сўнг, АҚШнинг Европа қўмондонлиги америкалик ўринбосар орқали гуруҳ ишидаги иштирокини сақлаб қолади. SAG-U 2024 йилнинг ёзида НАТОнинг Вашингтондаги саммитида ташкил этилган эди. Гуруҳ идораси Германиянинг Висбаден шаҳрида жойлашган.

2024 йил ўрталаридан бери SAG-U’га бошчилик қилиб келаётган генерал-лейтенант Кёртис Баззард жорий йилнинг 3 август куни истеъфога чиқади. Унинг ўрнини АҚШ иштирокини босқичма-босқич қисқартирадиган генерал-лейтенант Гийом Борепер эгаллайди. НАТО бўйича иттифоқчилар қўмондонликнинг топширилишини умуман олганда қўллаб-қувватлаган ва Европанинг роли кучайиши мантиқан тўғри кўринаётганини таъкидлаган.