АҚШ Тайванга 440 млн долларлик ўқ-дори ва ҳарбий техника сотишни маъқуллади

АҚШ Давлат департаменти Тайванга 332,2 миллион долларлик 30 миллиметрли ўқ-дорилар, асбоб-ускуналар, қуроллар ва зарур дастурий таъминот учун 108 миллион долларлик эҳтиёт қисмларни сотишга рухсат берди. Бу ҳақда АҚШ Мудофаа вазирлигининг Хавфсизлик бўйича ҳамкорлик агентлиги маълум қилди.

Кеча, 29 июнь куни агентлик керакли сертификатни берган ва Конгрессни ушбу юклар ҳақида хабардор қилган. Пентагон Тайванга қурол, ўқ-дорилар сотиш АҚШнинг жанговар тайёргарлигига зарар келтирмаслигига ишонтирган.

“АҚШдаги Тайбей иқтисодий ва маданий идораси турли 30 миллиметрли ўқ-дорилар, жумладан, HEI-T (юқори портловчи ёндирувчи – кузатувчи) ўқ-дорилари, кўп мақсадли ўқ-дорилар ва ўқув снарядларини харид қилиш бўйича сўров юборди”, дейилади хабарда.

Расмий Вашингтонга кўра, потенциал савдо Тайвань хавфсизлигини кучайтиради ва минтақада сиёсий барқарорлик, ҳарбий мувозанат ва иқтисодий тараққиётни сақлашга ёрдам беради.

Бундан ташқари, Тайванга ғилдиракли транспорт воситалари ва қуроллар учун эҳтиёт қисмлар, шунингдек, тахминан 108 миллион долларлик тегишли дастурий таъминот тақдим этилади.

Шу билан бирга, Тайвань ва АҚШ расмийлари оролга 4,54 миллиард Тайвань долларига (тахминан 146 миллион доллар) М136 Вулкан танкга қарши масофадан қазиб олиш тизимларини етказиб бериш бўйича шартнома имзолаган.

Маълумот учун, Қўшма Штатлар 1979 йилда Тайвань билан дипломатик алоқаларни узиб, Хитой билан алоқа ўрнатган. Аммо Вашингтон "ягона Хитой" сиёсатини тан олган ҳолда, айни пайтда Тайвань маъмурияти билан алоқаларни давом эттирмоқда ва мамлакатга қурол-яроғ етказиб бермоқда.