АҚШ Россияни янги санкциялар билан огоҳлантирди

АҚШ томони Россия Украинага қарши урушни тўхтатиш бўйича музокаралардан бош тортса, унга нисбатан янги санкциялар қўллаши мумкинлигини маълум қилди. Бу ҳақда АҚШнинг БМТдаги  доимий вакили Жон Келли хавфсизлик кенгашининг Украина бўйича ўтказилган йиғилишда айтиб ўтди.

Келлининг сўзларига кўра, Украина музокаралар ва муросага тайёр бўлса-да, Россия урушни давом эттирмоқда.

“Агар Россия урушни давом эттиришга қарор қилса, АҚШ музокаралардан воз кечади. Бу можарода ҳарбий ечим йўқ. Ҳозирги келишув Россия учун энг мақбул вариант. Президент Путин бунга рози бўлиши керак. Урушни давом эттириш ҳеч бир томон манфаатига мос эмас”, деган АҚШ вакили.

У шунингдек, АҚШ Россия билан тинчлик ва иқтисодий ҳамкорликка очиқлигини билдирган, бироқ бу йўлдан бош тортиш Москва учун янги санкциялар хавфини туғдиришини қўшимча қилган.

“Бу урушни тўхтатиш учун ҳам Россия, ҳам Украина жавобгардир. Можарони чўзишга уринаётганлар вақт йўқотмоқда. Иккала томон ҳам оғир, лекин тарихий қарорни – тинчлик йўлини танлаши керак”, деган Келли.

Ушбу йиғилишда Россиянинг БМТдаги доимий вакили Василий Небензя эса Ғарбни можарони чўзишда айблаган. У йиғилишда раислик қилаётган Грецияни танқид қилиб, НАТО ва Европа Иттифоқига аъзо ёки уларнинг иттифоқчиларидан яна беш давлат делегацияси чақирилганини, улар фойдасиз чиқишлар билан вақтни олганини айтган. Небензя Ғарб давлатларини БМТ йиғинларидан Россияни қораловчи тарғибот учун фойдаланаётганликда айблаган ва улар ҳақиқий тинчликка эришишни эмас, балки “Россия агрессияси” ҳақида ёлғон тасвир яратишни кўзлаётганини таъкидлаган.

Унинг сўзларига кўра, ҳозирги Украина раҳбарияти ва Ғарб иттифоқчилари бу можарони ўз сиёсий манфаатлари учун чўзишга ҳаракат қилмоқда.

“Улар урушни имкон қадар узоқ давом эттирмоқчи. Аммо бу уларга тобора қийин бўлиб боряпти, чунки АҚШнинг янги маъмурияти ниҳоят кўзини очди ва Зеленский режимининг асл моҳиятини ҳамда можаронинг илдиз сабабларини тушуниб етмоқда”, деган Россия вакили.

Небензя тинчлик музокараларини давом эттириш масъулияти ҳозирда Украина томонида эканини, Россия эса мунтазам равишда провокацияларга дуч келаётганини айтган.

БМТдаги Украина бўйича доимий вакилининг ўринбосари Кристина Гайовишин эса Украинада музокаралардан чўчимаётганини, аксинча Россия тинчлик таклифларини эътиборсиз қолдираётганини билдирган. У Президент Зеленский 16 май куни Истанбулда ўтган музокараларда иштирок этганини, Россияни эса паст даражадаги делегация вакиллари эгаллаб олганини эслатди.

Гаёвишиннинг айтишича, делегация таркиби 2022 йилдаги Истанбулдаги учрашувдаги билан бир хил бўлган, бу эса Россиянинг позицияси ўзгармаганидан дарак беради.

“Уларнинг мақсади Истанбулдаги музокараларни яна бир бор бўш ва расмиятчилик учун ўтказиладиган жараёнга айлантириш”, деган Гайовишин.

У Украина, энг камида 30 кунлик тўлиқ ва шартсиз ўт очишни тўхтатишни музокараларни давом эттириш учун асосий шарт сифатида илгари сураётганини яна бир бор таъкидлаган.

Эслатиб ўтамиз, аввалроқ АҚШ Президенти Дональд Трамп маъмурияти Россияга қарши янги “совға” сифатида санкциялар пакетини тайёрлагани ҳақида хабар берилганди. Ушбу чоралар банк соҳаси ва энергетика секторига нисбатан чекловларни ўз ичига олади. Санкциялар фақат Президент Дональд Трамп тегишли фармойиш берган тақдирда кучга киради. Аммо Трамп жорий йилнинг 19 май куни россиялик мавқедоши Владимир Путин билан телефон орқали суҳбатдан сўнг Россияга қарши янги санкциялар жорий қилмаслигини маълум қилганди. Буни у Украинадаги урушни тугатиш масаласида ҳали олдинга силжиш имконияти мавжудлиги билан изоҳлаган.