АҚШ Россияга қарши санкцияларни бекор қилиш режасини ишлаб чиқмоқда

АҚШ Президенти Дональд Трамп маъмурияти Россияга нисбатан санкцион босимни юмшатиш бўйича режа ишлаб чиқмоқда. Бу икки томонлама муносабатларни тиклашга қаратилган саъй-ҳаракатлар доирасида амалга оширилмоқда. Бу ҳақда исми ошкор этилмаган америкалик амалдор ҳамда вазиятдан хабардор манбага таяниб, “Reuters” хабар берди.

Агентлик манбаларининг таъкидлашича, Оқ уй АҚШ Давлат департаменти ва Молия вазирлигига қайси санкцион чекловларни юмшатиш мумкинлигини аниқлаш бўйича рўйхат тайёрлашни топширган. Ушбу рўйхат яқин вақт ичида Россия томони билан муҳокама қилиниши ва икки давлат ўртасидаги дипломатик ҳамда иқтисодий алоқаларни яхшилашга қаратилган музокаралар доирасида кўриб чиқилиши кутилмоқда.

Қайд этилишича, АҚШ айрим россиялик юридик ва жисмоний шахсларга, жумладан, баъзи олигархларга нисбатан жорий этилган санкцияларни бекор қилиш имкониятини кўриб чиқмоқда. Бироқ Вашингтон бу қадам эвазига Москвадан қандай имтиёзлар талаб қилиши мумкинлиги ҳозирча аниқ эмас.

Нашр манбаларининг маълум қилишича, Оқ уй Россияга нисбатан санкцияларни юмшатиш бўйича мумкин бўлган вариантларни ишлаб чиқиш бўйича топшириқни Трамп Украинадаги вазият бўйича фавқулодда ҳолат режимини узайтиришидан олдин берган. Мазкур режим Россиянинг Украинага нисбатан ҳаракатларида иштирок этган жисмоний ва юридик шахсларга нисбатан чекловлар жорий этишни назарда тутади. Бу санкциялар илк бор 2014 йилнинг март ойида Россия Қримни аннексия қилганидан сўнг Барак Обама маъмурияти томонидан киритилган бўлиб, кейинчалик Трампнинг биринчи президентлик муддати давомида ҳам бир неча бор кенгайтирилган.

АҚШ Молия вазири Скотт Бессент жорий йилнинг 20 февраль куни “Bloomberg” нашрига берган интервьюсида Россияга нисбатан санкцияларни юмшатиш истиқболлари унинг Украинадаги ўт очишни тўхтатиш бўйича музокаралардаги позициясига боғлиқлигини таъкидлаган.

Шу билан бирга, Россия Президенти Владимир Путиннинг халқаро иқтисодий ҳамкорлик бўйича махсус вакили Кирилл Дмитриев АҚШ билан иқтисодий алоқаларни кенгайтиришга тайёр эканини билдирган. Бундан ташқари, Россия Президентининг матбуот котиби Дмитрий Песков Россия катта ҳажмдаги нодир металлар захираларига эга экани ва уларнинг қазиб олиниши бўйича АҚШ билан келишувларни муҳокама қилишга тайёрлигини маълум қилган. 

Нашрга кўра, бу баёнотлар Владимир Путин АҚШ билан иқтисодий ҳамкорликни йўлга қўйиш таклифини билдирганидан кейин янграган. Бироқ бундай ҳамкорликнинг амалга ошиши Вашингтондан мавжуд чекловларни юмшатишни талаб қилади.

Эслатиб ўтамиз, олдинроқ Трамп АҚШнинг Киевга кўрсатаётган катта ҳажмдаги ҳарбий ва молиявий ёрдамини қоплаш мақсадида Украина билан фойдали қазилмалар қазиб олиш бўйича битим тузишга интилган эди. Оқ уй баёнотига кўра, ушбу лойиҳа Украина ҳудудида жойлашган йирик литий ва нодир металлар конларига асосланган бўлиши мумкин эди. Бироқ Дональд Трамп ва Украина Президенти Владимир Зеленский ўртасида юзага келган можаро сабабли ушбу келишув имзоланмаган.