AQSH orzusida Afrikada qolib ketgan ayol O‘zbekistonga qaytarildi

AQSHga ketish ilinjida Afrika va Lotin Amerikasi davlatlarida farzandi bilan og‘ir ahvolda qolgan ayol O‘zbekistonga qaytarildi. Bu haqda O‘zbekistonning Istanbul shahridagi Bosh konsulxonasi xabar berdi.

Qayd etilishicha, so‘nggi vaqtlarda Turkiya hududida ayrim toifadagi jismoniy va yuridik shaxslar tomonidan O‘zbekiston fuqarolariga yirik pul mablag‘lari evaziga AQSHga doimiy yashashga yuborish, shuningdek, Yevropa mamlakatlarining vizalarini rasmiylashtirib berishni va’da qilish orqali firibgarlik jinoyatlarining sodir etilishi holatlari ko‘paymoqda.

Bu toifadagi shaxslarga ishongan fuqarolar jiddiy muammolarga duch kelib, ularning ko‘rsatmasi bilan turli xorijiy davlatlarga, asosan Osiyo va Afrika davlatlariga borib, u yerda sarson-sargardon bo‘lmoqda.

Xususan, kecha, 26 fevral kuni AQSHga ketish ilinjida firibgarlar tuzog‘iga tushib, Afrika va Lotin Amerikasi davlatlarida farzandi bilan og‘ir ahvolda qolgan ayol Bosh konsulxona yordamida O‘zbekistonga qaytarilgan.

Xo‘sh, noqonuniy migratsiyaning qanday jiddiy oqibatlari bor. Bosh konsulxonaga ko‘ra, bular quyidagilar:

• Pul mablag‘larini firibgarlar o‘zlashtirib yuborishi;
• Hujjatlarning noqonuniy yo‘l bilan olib qo‘yilishi;
• Chet elda hujjatsiz qolib, huquqiy muammolarga duch kelish;
• Jinoiy javobgarlikka tortilish;
• Deportatsiya yoki uzoq muddatli taqiqlarga uchrash.

Eslatib o‘tamiz, avvalroq O‘zbekistonning Istanbul shahridagi Bosh konsulxonasi o‘zbekistonliklarni jinoiy guruhlar O‘zbekiston fuqarolariga katta pul mukofoti va’da qilib, ularni Yevropa Ittifoqiga, asosan Gretsiyaga noqonuniy muhojirlarni dengiz orqali o‘tkazishda vositachi sifatida ishlatishga harakat qilayotganidan ogohlantirgan edi.