АҚШ ноқонуний миграция муаммосини яширишга урунмоқда – NYP

АҚШ Президенти Жо Байден маъмурияти яқинлашиб келаётган президентлик сайловлари олдидан яхши имижни сақлаб қолиш мақсадида жанубий чегарадаги ноқонуний миграция муаммосини яширишга ҳаракат қилмоқда ва мухожирлар оммавий равишда аҳоли сони кам бўлган шаҳарларга кўчирилмоқда. Бу ҳақда ўз манбаларига таяниб, “New York Post” хабар берди.

Нашрнинг ёзишича, иммиграция ва божхона хизмати депортацияни тезлаштириш буйруғини олган, чегара патрули ходимлари эса Сан-Диегодан автобуслар ва самолётлар орқали мухожирларни кўпроқ сонли гуруҳларда ташимоқда. 

Қайд этилишича, ноқонуний мухожирлар аҳоли камроқ бўлган Техас ва Аризона чегара марказларига юборилмоқда. Сан-Диего округи чегара патрули раҳбари Жим Десмонд бу ҳаракатни Байден ва Ҳаррис маъмуриятининг сайловлар олдидан ўз имижини сақлаб қолишга уриниш деб атаган.

Нашрнинг АҚШ Ички хавфсизлик вазирлигидаги манбаларига кўра, ўтган ҳафта бир кунда Сан-Диегодаги мухожирларни ушлаб туриш марказида 1,2 мингдан ортиқ ноқонуний мухожирлар борлиги қайд этилган. Бу марказ эса аслида 1000 кишига мўлжалланган. Мухожирларни ташийдиган автобуслар бир неча ойдан бери қатнаётган бўлса-да, уларнинг сони янада сезиларли даражада ошган. 

“Бу барча ҳаракатлар Сан-Диегодаги кўчаларга мухожирларни чиқаришдан сақланиш учун амалга оширилмоқда, чунки маҳаллий ноҳукумат ташкилотлар тўлиб кетган ва бу аҳолининг норозилигига сабаб бўлиши мумкин”, дейилади хабарда.

Нашрга кўра, Жанубий чегарадаги ноқонуний миграция масаласи ноябрь ойидаги президентлик сайловлари учун энг долзарб масалалардан бири ҳисобланади. Сўнгги уч йилда АҚШ жанубий чегарасидаги ноқонуний киришлар рекорд даражаларга етган. Шунинг учун Жо Байден маъмурияти мухолифлар томонидан танқид қилинмоқда. Сўровномаларга кўра, сайловчилар демократик маъмуриятнинг чегара инқирозини ҳал қилиш борасидаги ишларидан норози.

Маълум қилинишича, Байден ўзининг президентлик даврининг бошида вице-президент Камола Ҳаррисга ноқонуний миграция масаласини ҳал қилишни топширган. Аммо демократик маъмуриятнинг фаолияти давомида муаммо рекорд даражага етган. Бу эса республикачилардан президентликка номзоди Дональд Трампнинг Ҳаррисни танқид қилиш учун қўл келмоқда. Танқиднинг яна бир сабаби – Ҳаррис ўз лавозимида бўлган даврда атиги икки марта чегарага ташриф буюрган. У яқинда жанубий ҳудудларга ташрифи давомида миграция тизимини тузатишни ваъда қилган.

Маълумот учун, АҚШда президентлик сайловлари жорий йилнинг 5 ноябрида бўлиб ўтади. Демократик партия номидан Камола Ҳаррис, республикачилар номидан эса собиқ президент Дональд Трамп президентлик учун курашади.

Эслатиб ўтамиз, аввалроқ АҚШ қонунчиларига тақдим этилган ички ҳисоботга кўра, АҚШ Президенти Жо Байден маъмурияти келгуси йилда 125 000 қочқинни қабул қилиш режасини сақлаб қолиши мумкинлиги хабар қилинган эди.