АҚШ Конгрессининг Вакиллар палатаси ХЖСга қарши санкцияларни маъқуллади

АҚШ Конгрессининг Вакиллар палатаси Республикачилар партияси томонидан Халқаро жиноий судга (ХЖС) қарши санкциялар қўллаш бўйича ишлаб чиқилган қонун лойиҳасини маъқуллади. Бу ҳақда CNN хабар берди.

Қонун лойиҳасини 247 депутат қўллаб-қувватлади ва 155 нафари қарши овоз берди. Ҳеч бир республикачи қонун лойиҳасига қарши чиқмади. Қонун лойиҳаси Сенатда муваффақиятсиз бўлиши кутилмоқда. Бироқ бу қонуннинг қабул қилиниши Исроил Мудофаа вазирлиги Ғазо секторидаги қирғин халқаро танқид қилиниши фонида Конгрессда Исроилни қўллаб-қувватлаш давом этаётганини акс эттиради.

"Халқаро жиноий судга қарши санкциялар қўллаш тўғрисидаги қарор унинг асоссиз даъволарига зарурий жавобдир. Бугунги овоз беришда ХЖС мансабдор шахсларининг қонунга зид хатти-ҳаракатлари чегараси аниқланди. Қўшма Штатлар Исроил билан қатъий туради ва халқаро бюрократларнинг Исроил раҳбарларини содир этмаган жиноятлари учун асоссиз ҳибсга олишга ордер беришига йўл қўймайди", дейди Вакиллар палатаси спикери Майк Жонсон.

Санкция ХЖС мансабдор шахсларининг Қўшма Штатларга киришини тақиқлайди, ҳар қандай АҚШ визаларини бекор қилади ва уларнинг Қўшма Штатларда мулкий операцияларни амалга ошириш имкониятларини чеклайди.

Исроилнинг Ғазо секторидаги ҳарбий кампанияси давомида 36 мингдан ортиқ одам ҳалок бўлди. Маҳаллий соғлиқни сақлаш идораларига кўра, вайроналар остида яна минглаб жасадлар кўмилган.

Эслатиб ўтамиз, ўтган ойда Халқаро жиноий суд прокурори Карим Хон Судгача бўлган палатадан Исроил Бош вазири Биньямин Нетаньяху ва мамлакат Мудофаа вазири Йоав Галантни ҳибсга олишга ордер беришни сўраган эди.