АҚШ Конгрессида Жанни Инфантино фаолияти бўйича тергов бошланди

АҚШ Вакиллар палатаси аъзоси Жейми Раскин FIFA президенти Жанни Инфантино фаолияти юзасидан тергов бошлади. Бу ҳақда “The Guardian” нашри хабар берди.

Маълумотларга кўра, Раскин FIFA’дан ташкилотнинг АҚШ Президенти Дональд Трамп ва унинг маъмурияти билан алоқаларга оид ҳужжатларни тақдим этишни талаб қилган.

Шунингдек, у FIFA’дан Нью-Йоркдаги бош қароргоҳ ижарага олинган давр мобайнида Майами ва Нью-Йорк офисларига ташриф буюрган шахслар рўйхатини ҳам тақдим этишни сўраган.

Раскиннинг мактубида АҚШ Адлия вазирлигининг жаҳон футболидаги коррупция ишлари бўйича айбланган шахсларга нисбатан айрим айбловларни бекор қилиш ҳақидаги қарори ҳам тилга олинган. Жумладан, 2015 йилда FIFA’нинг 20 нафардан ортиқ юқори лавозимли амалдори ва спорт маркетинги соҳаси раҳбарларига қарши қўзғатилган жиноий ишлар қайд этилган.

Мактуб сўнгида Раскин Жанни Инфантинодан Вакиллар палатаси Суд қўмитаси мажлисида расмий кўрсатма беришини сўраган.

Эслатиб ўтамиз, аввалроқ Испания Ла Лигаси президенти Хавьер Тебас FIFA президенти Жанни Инфантинони кескин танқид қилиб, унинг тизимини чириганлигини айтганди.