АҚШ Италиядан Ғазо можаросини ҳал этишда ёрдам сўради 

Америка Қўшма Штатлари Италияни Ғазо секторида ташкил этилиши режалаштирилаётган халқаро барқарорлик кучларига асосчи аъзо сифатида қўшилишга таклиф қилди. Бу ҳақда “Bloomberg” хабар берди.

Манбаларга кўра, ушбу сўров жорий ҳафта давомида дипломатик каналлар орқали Италия Бош вазири Жоржа Мелони идорасига юборилган. Мазкур масала бўйича якуний қарорни шахсан Бош вазир қабул қилиши кутилмоқда.

Агентликнинг аниқлик киритишича, Италиядан ташаббусда тўлиқ иштирок этиш, яъни Ғазо секторига ҳарбий контингент юбориш талаб қилинмайди. Рим бошқа мамлакатлардан келадиган тинчликпарвар кучларни тайёрлаш ва ўқитиш билан чекланиши мумкин.

Нашрнинг қайд этишича, Италия ҳозирча Ғазодаги халқаро барқарорлик кучларига қўшилиш масаласида иккиланмоқда. Бундан ташқари, мамлакат АҚШ ташаббуси билан тинчлик жараёнини мувофиқлаштириш учун тузилган Ғазо “Тинчлик кенгаши” низомини ҳам ҳозирча имзоламаган.

Бунгача Жоржа Мелони АҚШ Президенти Дональд Трампдан “Тинчлик кенгаши” форматини ўзгартиришни сўрагани ҳақида хабар берилган эди. Мелонининг айтишича, ушбу ташаббусни шакллантириш услубида айрим объектив конституциявий муаммолар мавжуд.

Эслатиб ўтамиз, аввалроқ жорий йилнинг 22 январь куни Ўзбекистон Республикаси Президенти Шавкат Мирзиёев Швейцариянинг Давос шаҳрида “Тинчлик кенгаши” низомини имзолаш маросимида иштирок этди ва бу орқали Ўзбекистон уни таъсис этган давлатлардан бирига айланган эди.