АҚШ грин-карта эгаларини депортация қилишни осонлаштирди

Бугун, 24 июнь куни АҚШ Олий суди федерал чегара хизмати ходимларига Америка грин-картасига эга бўлган шахсларни депортация қилиш имконини берувчи қарор қабул қилди. Бу ҳақда ABC News хабар берди.
 
Суд қарори билан белгиланишича, чегара хизмати агентлари агар грин-карта эгаси гумонланувчи бўлса, унга мамлакатга киришни рад этишлари мумкин. Шу билан бирга, чегара агентлари жиноят содир этилганига оид далилларни тақдим этишга мажбур эмаслиги, “шунчаки гумон қилиш учун асослар мавжудлигининг ўзи кифоя” эканлиги алоҳида таъкидланган. Ушбу янгилик, шунингдек, АҚШга кириш пунктларига етиб борган шахсларни қонуний доимий резидент (LPR) мақомидан маҳрум қилиш тартибини чегара хизматлари учун сезиларли даражада осонлаштиради.

АҚШнинг амалдаги иммиграция қонунчилигига кўра, АҚШ ҳудудини қонуний асосда қисқа муддатга тарк этган грин-карта эгаларининг мамлакатга қайта киришига рухсат берилиши керак. Бундан фақат грин-карта эгаси жиноят содир этганликда айбдор деб топилган ёки айбига ўзи иқрор бўлган ҳолатларгина мустасно эди.

Олий суднинг бир қатор судьялари қабул қилинган қарорга қарши чиққан. Уларнинг фикрича, ҳукумат грин-карта эгасини доимий резидентлик мақомидан маҳрум қилишдан олдин, унинг ҳақиқатан ҳам жиноят содир этганини аввал исботлаб бериши шарт.

Эслатиб ўтамиз, аввалроқ АҚШ расмийлари вақтинчалик визага эга бўлган хорижликлар учун грин-карта олиш қоидаларини қайта кўриб чиққани ҳақида хабар берилган эди. Унга кўра, эндиликда ариза берувчиларнинг аксарияти ушбу жараёндан мамлакат ташқарисида ўтишларига тўғри келади.