АҚШ Ғазо секторига инсонпарварлик ёрдамининг биринчи партиясини етказди

Америка Қўшма Штатлари кеча, 2 март куни Ғазога инсонпарварлик ёрдамини ҳаво орқали олиб ўта бошлади. Бу ҳақда “Америка овози” хабар берди.

Жо Байден маъмурияти расмийларининг айтишича, 35 минг порция озиқ-овқатни ўз ичига олган жами 66 та пакет ҳавода олиб кетилган. Гуманитар ёрдам етказиш учун учта C-130 самолётидан фойдаланилган.

1 март куни Италия Бош вазири Жоржия Мелони билан учрашув чоғида Жо Байден қамалдаги Фаластин анклавига ҳаво орқали инсонпарварлик ёрдамини етказиш бўйича саъй-ҳаракатлар бошланганини эълон қилган. Оқ уй ҳаво орқали озиқ-овқат етказиб бериш доимий ҳаракат бўлишини, Исроил ташаббусни қўллаб-қувватлаганини билдирди.

Миллий хавфсизлик кенгашининг стратегик алоқалар бўйича координатори Жон Кирби Оқ уйда бўлиб ўтган брифингда сўзга чиқиб, бундай операцияларнинг мураккаблигини таъкидлади.

“Бу қийин ҳарбий миссия, чунки кўп параметрлар аниқ бажарилиши керак. Биз бунга ҳар қандай ўхшаш операция каби, зудлик билан ҳаракат қилишимиз кераклигини билиб, эҳтиёткорлик билан ёндашамиз. Биз бу эҳтиёждан хабардормиз. Биз буни иорданиялик ҳамкорларимиз билан бирга қиламиз ва режалаштириш юқори даражада амалга оширилади. Бу бир марталик тадбир бўлмайди. Ҳаво орқали қўшимча гуманитар ёрдам етказиш режалаштирилган ва амалга оширилади. Уларнинг ҳар бири билан биз жараённи ўрганамиз ва яхшилаймиз, деб ўйлайман. Бу жуда қийин. Ғазо каби аҳоли зич жойлашган ҳудудда буни амалга ошириш ниҳоятда қийин”, дейди Кирби. 

Қайд этилишича, бошқа давлатлар, жумладан Франция, Миср ва Иордания ҳам Ғазога ёрдам етказган.

Бирлашган Миллатлар Ташкилоти ёрдам етказиб бериш йўлида "енгиб бўлмас тўсиқлар"га дуч келаётганини бир неча бор таъкидлаган. БМТнинг гуманитар масалаларни мувофиқлаштириш бошқармаси Ғазо секторида камида 576 минг киши, яъни анклав аҳолисининг чорак қисми очарчилик ёқасида турганини маълум қилган. Шифокорларнинг айтишича, болалар тўйиб овқатланмаслик ва сувсизликдан ўлмоқда.

Эслатиб ўтамиз, 29 февраль куни Исроилнинг Ғазо секторида гуманитар ёрдам кутаётган фаластинликларга ҳужум қилгани оқибатида 100 дан ошиқ одам ҳалок бўлганди. БМТ Хавфсизлик Кенгаши эса АҚШнинг қаршилиги сабаб мазкур ҳолат учун Исроил ҳарбийларини айблаган баёнотни қабул қила олмади.