АҚШ фонд бозори тарихида сенсация: Meta акциялари арзонлашиб кетди 

Facebook’нинг бош компанияси Meta Platforms акциялари Нью-Йорк фонд биржасидаги савдолар очилишида 26 фоиздан кўпроқ арзонлашди. Бу ҳақда “Bloomberg” хабар берган. 

Таъкидланишича, биржа ёпилишида битта қимматли қоғоз 237,76 долларни ташкил этган, бу аввалги савдо сессияси ёпилишидан 26,39 фоизга кам. 

Қайд этилишича, Meta’нинг бозор қиймати 251 миллиард долларга тушган. Маълумотларга кўра, бу фонд бозори тарихидаги ҳар қандай АҚШ компанияси учун бозор қийматининг бир кунлик энг йирик пасайиши ҳисобланади. Охирги савдо сессиясида Meta капиталлашуви 900 миллиард доллардан ошган бўлса, ҳозир у 660 миллиард доллардан сал ошган. 

Meta акциялари Meta компаниясининг 2021 йилнинг 4-чорак молиявий ҳисоботи эълон қилинганидан сўнг тушиб кетган. Унда соф даромаднинг 8 фоизга камайиб, 10,28 миллиард долларга етгани кўрсатилганди. 

Meta, шунингдек, Facebook’нинг кунлик фаол фойдаланувчилари ижтимоий тармоқнинг 18 йиллик тарихида биринчи марта камайгани ҳақида хабар берган. 

Аввалроқ, Meta компанияси сунъий интеллектга асосланган суперкомпьютер — AI Research SuperCluster (RSC) ишлаб чиқилганини эълон қилганди.  

Маълумот ўрнида, Американинг Facebook компанияси 2021 йил 28 октябрда ўз номини Meta’га ўзгартирди. Компания томонидан ўйлаб топилган янги ном нафақат дастурларни, балки тўлдирилган реаллик қурилмаларини ҳам бирлаштирадиган танланган “метакоинот” концепциясининг давомидир.