AQSH Eronga qarshi zarbalarni yumshatish niyatida emas

AQSH harbiylari Eronga qarshi boshlangan keng ko‘lamli operatsiyani davom ettiradi va zarbalarni kamaytirish rejalashtirilmayapti. Bu haqda bugun, 2 mart kuni AQSH Markaziy qo‘mondonligi (CENTCOM) vakili kapitan Tim Xokins “Al Arabiya” nashriga bergan intervyusida aytib o‘tdi.

Uning aytishicha, AQSH kuchlari Erondagi 1000 dan ortiq nishonga zarba bergan. Ular orasida: 

Eron Islom inqilobi qo‘riqchilari korpusi shtab-kvartiralari;

Qo‘mondonlik va boshqaruv markazlari;

Havo mudofaasi tizimlari;

Ballistik raketa ob’ektlari;

Harbiy aloqa tizimlari;

Eron dengiz floti kemalari va suv osti kemalari bor.

AQSH rasmiysining bildirishicha, Eronning qarshi hujumlari oqibatida kamida uch nafar amerikalik harbiy halok bo‘lgan, yana bir necha kishi og‘ir yaralangan. Yaqin kunlarda qurbonlar soni oshishi mumkin.

AQSH–Isroil–Eron urushi

Kecha, 28 fevral kuni Isroil kutilmagan vaqtda Eronga qarata havodan zarbalar yo‘lladi. Ushbu zarbalar Eronning muhim ob’ektlari – Prezident qarorgohi, davlat idoralari va yadro inshootlariga tekkani iddao qilinmoqda. Eronning “Mehr” axborot agentligi Tehrondagi Eron razvedka binosiga ham hujum qilinganini yozgan. Dastlabki manbalarga ko‘ra, Eronga o‘ttizdan ortiq raketalar yo‘llangan bo‘lishi mumkin.

Oradan biroz vaqt o‘tib Isroil Mudofaa kuchlari Eronga hujumni rasman tasdiqlagan. Shuningdek, Mudofaa vazirligi Isroil fuqarolaridan xavfsiz joyga yashirinishni so‘ragan. Mamlakatda shoshilinch ravishda favqulodda holat e’lon qilingan.

Shu orada AQSH Prezidenti Donald Tramp Eron bo‘yicha operatsiyalar haqida 8 daqiqalik bayonot bergan va unda Eronga qilingan hujumda AQSHning ishtirok etganini tasdiqlagan. Uning qayd etishicha, Eronga qilingan harbiy opreatsiyalar Amerika xalqini himoya qilish uchun amalga oshirilmoqda. U o‘z bayonotida eronliklarni amaldagi tuzumni ag‘darishga chaqirgan. Tramp Eron harbiy xizmatchilariga taslim bo‘lishni va buning evaziga “immunitet” olishni taklif qildi yoki “muqarrar o‘lim”ni tanlashlari mumkinligini aytgan.

Qolaversa, barcha voqealarni bir chetdan kuzatib turgan Eron sobiq valiahd shahzodasi Rizo Pahlaviy ham Eron xalqiga murojaat qilib, mamlakat uchun hal qiluvchi lahzalar kelganini ta’kidlagan. Shuningdek, u bu so‘nggi jang ekanini va unda Eron xalqi Islom Respublikasi tuzumi ustidan g‘alaba qozonishini ta’kidlagan.

Oradan ko‘p vaqt o‘tmay endi Eron Isroil davlati hududiga qarata zarba yo‘llashni boshladi.

Isroil Bosh vaziri Binyamin Netanyaxu ham hujumlarni tasdiqlab, bayonot bergan. Unga ko‘ra, Isroil va AQSHning Eronga qarshi qo‘shma operatsiyasi Eron terror rejimi keltirib chiqarayotgan tahdidni bartaraf etishga qaratilgan. Netanyaxu maxsus murojaatida so‘nggi 47 yil davomida Eron rahbariyati Isroil va AQSHga qarshi ochiq tahdidlar qilgan hamda mintaqada zo‘ravonlik siyosatini yuritganini aytgan.

Avvalroq, Eron davlat televideniyesi Xomanaiy Isroil va AQSH tomonidan o‘ldirilganini xabar qilgan edi. Eronning “Tasnim” axborot agentligi ma’lumotlariga ko‘ra, u kecha, 28 fevral kuni ertalab o‘z ishxonasida o‘ldirilgan. Oyatullohning vafoti munosabati bilan mamlakat bo‘ylab 40 kunlik umumxalq motami va 7 kunlik umumxalq dam olish kunlari e’lon qilindi.

Shuningdek, Eron hududiga uyushtirilgan hujum chog‘ida Oyatullohning oila a’zolaridan to‘rt kishi – qizi, kuyovi, nabirasi va kelinlaridan biri ham halok bo‘lgan.

Qayd etish joiz, Eron Islom inqilobi qo‘riqchilari korpusi Islom Respublikasi Oliy rahbari Oyatulloh Ali Xomanaiyning vafoti tasdiqlanganidan so‘ng, mamlakat “Qurolli kuchlari tarixidagi eng shiddatli hujum operatsiyasi” boshlanganini ma’lum qilgandi.

Shundan so‘ng, Eron Islom inqilobi qo‘riqchilari korpusi mamlakat Isroil va AQSHga qarshi yangi hujumlar boshlanganini e’lon qildi.

Rasmiylar AQSH qurol-yarog‘ zaxiralari juda tez sarflanayotganidan xavotir bildirmoqda. 

AQSH Davlat departamenti fuqarolarni hushyor bo‘lishga chaqirgan. Yaqin Sharqdagi ayrim elchixonalarda xodimlar va ularning oila a’zolari evakuatsiya qilinmoqda. Shuningdek, AQSH ichkarisida ham xavfsizlik choralari kuchaytirilgan. Vashingtonda, jumladan Kapitoliy atrofida qo‘shimcha xavfsizlik kuchlari joylashtirilishi kutilmoqda.

Eslatib o‘tamiz, avvalroq Eron Milliy xavfsizlik oliy kengashi kotibi Ali Lorijoniy Tehron AQSH bilan hech qanday muzokara olib bormasligini bildirgandi.