АҚШ билан музокаралар учун Эрон делегацияси Покистонга борди

Эрон делегацияси АҚШ билан музокараларда иштирок этиш учун кеча, 10 апрель куни кечқурун Исломободга етиб келди. Бу ҳақда Покистон Ташқи ишлар вазирлигига таяниб, “Al Jazeera” хабар берди.

Делегацияга Эрон Ташқи ишлар вазири Аббос Ароқчи ҳамда парламент спикери Муҳаммад Бағир Ғолибоф бошчилик қилмоқда.

Покистоннинг АҚШдаги элчиси Ризвон Саййид Шоҳ музокаралар осон кечмаганини таъкидлаб, Вашингтон ва Теҳронни мулоқотга олиб келган “биргина сеҳрли ечим” бўлмаганини, балки бу сабр ва барча томонларнинг доимий саъй-ҳаракатларини талаб қилган жараён эканини айтган. Унинг сўзларига кўра, музокараларнинг ўзиёқ катта ютуқ бўлиб, Покистон келишувга эришиш учун зарур бўлган барча ишларни давом эттиришга тайёр.

Қайд этиш жоиз, 8 апрель куни АҚШ ва Эрон ўртасида икки ҳафталик сулҳга эришилган, 11 апрель куни эса Покистонда музокаралар ўтказилиши режалаштирилган. Томонлар аллақачон ўз позицияларини билдирган: АҚШ санкцияларни бекор қилиш ва Ҳормуз бўғозини очишни таклиф қилган, Эрон эса бўғоз устидан назоратни сақлаб қолиш ва минтақадаги ҳарбий ҳаракатларни тўлиқ тўхтатишни талаб қилган.

Шу билан бирга, учрашувдан олдин ҳар икки томон бир-бирини дастлабки келишувларни бузишда айблаган.

Эслатиб ўтамиз, аввалроқ Туркия Президенти Ражаб Тойиб Эрдўған Эрон Президенти Масъуд Пезешкиён билан телефон орқали суҳбатда Покистонда бошланиши кутилаётган музокаралардан доимий тинчлик ва барқарорликни таъминлаш йўлида максимал даражада фойдаланиш зарурлигини таъкидлаганди.