АҚШ 6-авлод қирувчи самолётини эълон қилди

АҚШ Президенти Дональд Трамп АҚШнинг Boeing компанияси томонидан ишлаб чиқилаётган дунёдаги биринчи 6-авлод қирувчи самолёти F-47 ни эълон қилди. Бу ҳақда CNN хабар берди.

“Менинг буйруғим билан АҚШ ҳарбий-ҳаво кучлари дунёдаги биринчи 6-авлод қирувчи самолётини яратишга киришди. Дунё бундай нарсани ҳали кўрмаган”, дейди Трамп.

F-47 ҳақида эълон қилиш маросими кеча, 21 март куни Оқ уй Овал кабинетига бўлиб ўтган. Маросимда Трамп билан бирга АҚШ Мудофаа вазири Пит Хегсет ва армиянинг генераллари ҳам иштирок этган. Залга янги самолётнинг тахминий тасвири туширилган баннерлар ҳам жойлаштирилган.

Трамп қирувчи нима учун айнан F-47 деб номлангани ҳақида изоҳ бермаган. У бу “чиройли сон” эканини айтиб, номни генераллар танлаганини қўшимча қилган. Айрим оммавий ахборот воситалари эса Трампнинг ҳозирда АҚШнинг 47-президенти эканига ишора қилган.

Трампнинг сўзларига кўра, янги қирувчи самолёт тезлик, манёвр ва жанговар юк кўтариш бўйича барча аналогларидан устун бўлади ва “энг ўлимли” ҳарбий самолётга айланади. Унда яширин (stealth) технология қўлланиб, деярли кўринмас бўлиши таъкидланди.

Трампнинг таъкидлашича, F-47 устида деярли беш йилдан бери иш олиб борилмоқда ва экспериментал версияларда синов парвозлари аллақачон амалга оширилган. Ҳарбий-ҳаво кучлари Boeing компаниясини асосий ишлаб чиқарувчи сифатида танлаган. Олдинги авлод F-35 қирувчиси Lockheed Martin томонидан ишлаб чиқилган эди.

Президентнинг сўзларига кўра, F-47 самолётлари келгуси бир неча йил ичида ҳозирги маъмурият даврида ишлаб чиқарилади.

AFP агентлигининг эслатишича, АҚШда олтинчи авлод қирувчи самолёт яратиш дастури NGAD (Next Generation Air Dominance – “Янги авлод ҳаво устунлиги”) номи билан маълум бўлган. 2018 йилда АҚШ Конгресси битта NGAD самолётининг нархи 300 миллион долларгача етиши мумкинлигини ҳисоблаб чиққан. 2024 йилда АҚШ ҳарбий-ҳаво кучлари NGAD дастурини вақтинча тўхтатган эди.

“Associated Press” агентлиги NGAD лойиҳасининг умумий қийматини 20 миллиард доллар деб баҳоласа, айрим экспертлар бу суммани юзлаб миллиард долларга етишини тахмин қилмоқда. АҚШда бу дастур зарурлигига шубҳа билан қараётган танқидчилар ҳам бор. Уларнинг фикрича, F-35 ва олтинчи авлод бомбардимончи B-21 Raider ҳам айни функцияларни бажаришга қодир.