АҚШ ҲАМАС етакчиларига қарши янги санкцияларни эълон қилмоқчи

АҚШ Молия вазирлиги шу ҳафта ҲАМАС ҳаракатига қарши янги санкциялар эълон қилишга тайёрланмоқда. Бу ҳақда “Axios” нашри хабар берди.

Сайтнинг АҚШдаги расмий манбаларига кўра, АҚШ Молия вазирлиги шу ҳафтада бир қанча ҲАМАС етакчиларига қарши янги санкциялар эълон қилади. 

 Унга кўра, Америка санкциялари ҲАМАС активлари сақланадиган қатор мамлакатларга босимни кучайтириш ва шу тариқа маблағлар оқимини тўхтатишга қаратилади.

АҚШ Молия вазирлиги мавжуд санкцияларнинг ишлаши ва янгиларини жорий этилишини таъминлаш учун хусусий сектор вакиллари билан яқиндан ишламоқда.

Эслатиб ўтамиз, аввалроқ АҚШ бир вақтнинг ўзида Украина ва Исроилни қўллаб-қувватлашини билдирганди.

Исроил-Фаластин можароси

Жорий йилнинг 7 октябрь куни эрталаб Ғазо секторидан Исроил ҳудудига ракета ҳужуми бошланди. Кейинчалик ҲАМАС Исроилга қарши “Ал-Ақсо тўфони” ҳарбий операцияси бошланганини эълон қилди. Исроил Мудофаа кучлари эса бунга жавобан “Темир қиличлар” “аксилтеррор операцияси”ни бошлади.

Шундан сўнг, Бош вазир Биньямин Нетаньяху исроилликларга мурожаат билан чиқиб, мамлакатда содир бўлаётган воқеалар ҳарбий операция эмас, балки тўлақонли уруш эканини айтди.  9 октябрь куни Исроил Мудофаа вазири Йоав Галант Исроил ҳарбийлари Ғазо секторини кенг кўламли блокадага киришаётганини маълум қилди. У Ғазо секторида электр, озиқ-овқат, ёқилғи бўлмаслигини, ҳамма нарса ёпилишини айтди. 

Шунингдек, Исроил Ғазо секторидаги Ал-Ярмук, Ал-Эмин Муҳаммад, Аҳмад Ясин, Муҳаммад Эл-Ҳабиб, Эс-Суси ва Ал-Ғарби масжидларига зарба берди.  Бу орада Америка Қўшма Штатлари Ғазо сектори атрофидаги кескинлик фонида “Эронни жиловлаш учун” Яқин Шарққа қўшимча 20-25 та F-35 ва F-15 қирувчи самолётларини юбориши маълум бўлди. Германия эса Фаластин ҳудудларидаги гуманитар лойиҳалар учун аввал тасдиқланган маблағларни ажратишни тўхтатди.

Венесуэла Президенти Николас Мадуро эса Исроилни Фаластин халқини қирғин қилишда айблаб, зудлик билан тинчлик музокараларини бошлаш ва Фаластиннинг ҳудудий ҳуқуқларини кафолатловчи БМТ резолюцияларини амалга оширишга чақирди. Россия Президенти Владимир Путин ҳам мустақил суверен Фаластин давлатини яратиш зарурлигини айтиб ўтди. Шунингдек, у Исроил ва ҲАМАС ўртасидаги қуролли тўқнашувларни АҚШ сиёсати муваффақиятсизлигининг яққол мисоли деб атади. Украина Президенти Владимир Зеленский эса Яқин Шарқдаги бу можародан Россия манфаатдорлигини таъкидлади.