Афғонистон ва Покистон ўт очишни тўхтатиш бўйича келишиб олди

Афғонистон ва Покистон Доҳада ўтган музокаралар давомида зудлик билан ўт очишни тўхтатиш бўйича келишувга эришди. Бу ҳақда Қатар Ташқи ишлар вазирлиги хабар берди. 

Музокараларда Қатар ва Туркия воситачилик қилган.

“Томонлар зудлик билан ўт очишни тўхтатиш ҳамда икки давлат ўртасида тинчлик ва барқарорликни мустаҳкамлаш механизмларини яратиш тўғрисида келишиб олди”, дейилади вазирлик баёнотида. 

Шунингдек, Афғонистон ва Покистон барқарор сулҳ режимини таъминлаш мақсадида янги учрашувлар ўтказишга ҳам келишиб олган.

Қайд этиш жоиз, Афғонистон ва Покистон чегарасида жанглар 11 октябрда бошланган эди. 15 октябрь куни икки кунлик сулҳ кучга кирган, бироқ унинг муддати тугагач, тўқнашувлар қайта бошланган.

Эслатиб ўтамиз, аввалроқ Эрон Ташқи ишлар вазири Аббос Ароқчи ва Афғонистондаги “Толибон” муваққат ҳукумати ташқи ишлар вазири Амирхон Муттақи ўртасида телефон орқали суҳбат бўлиб ўтганди. Мулоқотда минтақадаги сўнгги воқеалар ва икки давлат ўртасидаги муносабатлар муҳокама қилинган. Эрон вазири Қобул ва Исломобод ўртасидаги сўнгги тўқнашувлардан хавотир билдирар экан, можаронинг давом этиши бутун минтақанинг барқарорлигига таҳдид солишини билдирган. Ароқчининг сўзларига кўра, Теҳрон кескинликни камайтириш ва конструктив музокараларга кўмаклашишга тайёр.