“Адана Демирспор” “Галатасарой”га қарши ўйиндаги ҳолатга изоҳ берди

Туркия Суперлигаси вакили “Адана Демирспор” клуби матбуот хизмати “Галатасарой”га қарши ўйиндаги вазият бўйича расмий муносабат билдирди. Баёнот клубнинг Х саҳифасида эълон қилинди.

“12-дақиқада жамоамиз дарвозасига ноҳақ пенальти белгиланди. Шу сабабдан биз ВАР аралашувини кутгандик. Аммо ВАР тизимидан дарак чиқмаганидан кейин Туркия футбол федерацияси президенти билан боғланиб, майдонни тарк этиш қароримиз ҳақида маълум қилдик. Қароримиз тўртинчи ҳакамга бир неча бор етказилган. бироқ стадиондаги шовқин туфайли футболчиларимизга кеч етказилган. Керакли чоралар кечиккан ва натижада жараён 30-дақиқагача чўзилган. Бу қарор ҳакамларнинг тизимли ва қасддан йўл қўйган хатолари ҳамда адолатсизликларига клубимизнинг жавобидир. Охирги йилларда бўлгани каби жорий мавсумда ҳам ҳакамларнинг қарорларига катта сабр-тоқат кўрсатган бўлсак-да, адолатсиз, хато ва нохолис қарорлар кўпайиб бормоқда. Бу ноҳақ ва нохолис қарорлар бизга қарши эмас, балки Туркия футбол федерацияси ва Марказий ҳакамлар қўмитасига, улар олиб бораётган тизимларга қаршиликдир”, дейилади баёнотда.

Эслатиб ўтамиз, аввалроқ, “Галатасарой” - ”Адана Демирспор” ўйинида ҳакамнинг қарорлари сабаб, аданалик футболчилар ўйинни давом эттиришдан бош тортганди.