Аҳмадалиев - Иноуэ жанги шу йил ўтказилади

Ўзбекистонлик профессионал боксчи, вақтинчалик WBA камари соҳиби Муроджон Аҳмадалиев вазннинг мутлақ чемпионати япониялик Наоя Иноуэ билан шу йилнинг ўзидаёқ жанг қиладиган бўлди. Бу ҳақда Аҳмадалиевнинг промоутери Эдди Хирн “BoxingScene” нашрига маълум қилди.

Манбага кўра, томонлар ўртасида жанг бўйича келишувга эришилган. Тўқнашув шу йил 14 сентябрда Японияда ўтказилиши кутилмоқда, аммо мазкур жанг ўтказилиши учун ҳар икки боксчи 4 май куни рингга кўтарилиб, ўз рақибларини мағлуб этиши керак.

4 май куни Американинг Лас-Вегас шаҳрида катта бокс кечаси ўтказилади. Мусобақада Иноуэ америкалик Рамон Карденасни мағлуб этсагина сентябрь ойида ўзбекистонлик рақиби билан тўқнашади. Ўз навбатида 30 ёшли Аҳмадалиев ҳам 4 май кунги жангида зафар қучиши лозим. Аҳмадалиевнинг бўлажак рақиби номи ҳозирча номаълум.

Маълумот учун, 31 ёшли Иноуэ боксда 29-0 рекордга эга. У жангларининг 26 тасида рақибларини нокаутга учратган. Аҳмадалиев эса 13-1 рекордга эга. Ўзбекистонлик чарм қўлқоп устаси жангларидан 10 тасини муддатидан аввал якунлаган.