Ahmadaliyev - Inoue jangi shu yil o‘tkaziladi

O‘zbekistonlik professional bokschi, vaqtinchalik WBA kamari sohibi Murodjon Ahmadaliyev vaznning mutlaq chempionati yaponiyalik Naoya Inoue bilan shu yilning o‘zidayoq jang qiladigan bo‘ldi. Bu haqda Ahmadaliyevning promouteri Eddi Xirn “BoxingScene” nashriga ma’lum qildi.

Manbaga ko‘ra, tomonlar o‘rtasida jang bo‘yicha kelishuvga erishilgan. To‘qnashuv shu yil 14 sentyabrda Yaponiyada o‘tkazilishi kutilmoqda, ammo mazkur jang o‘tkazilishi uchun har ikki bokschi 4 may kuni ringga ko‘tarilib, o‘z raqiblarini mag‘lub etishi kerak.

4 may kuni Amerikaning Las-Vegas shahrida katta boks kechasi o‘tkaziladi. Musobaqada Inoue amerikalik Ramon Kardenasni mag‘lub etsagina sentyabr oyida o‘zbekistonlik raqibi bilan to‘qnashadi. O‘z navbatida 30 yoshli Ahmadaliyev ham 4 may kungi jangida zafar quchishi lozim. Ahmadaliyevning bo‘lajak raqibi nomi hozircha noma’lum.

Ma’lumot uchun, 31 yoshli Inoue boksda 29-0 rekordga ega. U janglarining 26 tasida raqiblarini nokautga uchratgan. Ahmadaliyev esa 13-1 rekordga ega. O‘zbekistonlik charm qo‘lqop ustasi janglaridan 10 tasini muddatidan avval yakunlagan.