9 йилга қамалган афсонавий футболчи қамоқда нималар билан банд?

Бразилиялик собиқ футболчи Робиньонинг панжара ортига кирганига роппа-роса бир йил бўлди. 2023 йилда у 2013 йилда Миланда содир этилган гуруҳ бўлиб зўравонликда иштирок этгани учун тўққиз йиллик қамоқ жазосига ҳукм қилинганди. “Реал”, “Милан” ва “Манчестер Сити” клубларининг собиқ футболчиси ўз айбини инкор этишда давом этаётганига қарамай, у жазодан қутула олмади.

Футболчининг адвокатлари Бразилия суд тизими Италия адлия тизимига бўйсунмаслиги кераклигини таъкидлаб, ишни кўриб чиқишга уриниб кўрди. Бироқ, ҳозирча Робиньо Сан-Паулудаги “машҳурлар қамоқхонаси” номи билан машҳур бўлган энг юқори даражадаги Тремембе қамоқхонасида қолмоқда. Бу ерда юқори мартабали жиноятчилар, сиёсатчилар ва ҳатто кетма-кет қотиллик содир этган шахслар сақланади.

Оғир шароитларга қарамай, собиқ футболчи ўзини намунали тутишга ҳаракат қилиб, белгиланган жазони имкон қадар юмшатиш ниятида. Бразилия ОАВи унинг хатти-ҳаракати намунали эканини ёзмоқда: у китобхонлик тўгарагига қатнашади, боғдорчилик билан шуғулланади, маиший техника таъмирлайди ва ҳатто камерадошлари билан футбол ўйнайди.

Шартли озодликка чиқиш умидида Робиньо хурмача қилиқлар қилмаяпти, ҳар 12 соатлик иш учун унинг жазо муддати бир кунга қисқаради. Ҳозир у 22 ёшли маҳбус билан 8 квадрат метрлик камерада яшайди. Фақат яқин оила аъзолари, шу жумладан яқинда “Сантос” билан шартнома имзолаган 17 ёшли ўғли футболчи ҳолидан хабардор бўлиб туриши мумкин, Робиньонинг қолган яқинларида бунақа ваколат йўқ.

Айни пайтда суд жараёнлари давом этмоқда, аммо ҳукмнинг бекор қилинишига умид кам. 2020 йилда Италия суди ниҳоят ҳукмни тасдиқлади ва иш бўйича айбланувчилардан бири яқинда Бразилияда ўлик ҳолда топилди. Робиньо эса биринчи навбатда умрбод қамоқ жазосига психологик томондан тайёрланиши ва жазони қисқартириш учун курашиши керак.