82 млн долларлик можаро: Венгрия украиналик банк ходимларини қўлга олди

Венгрия ҳукумати 82 миллион долларга яқин нақд пул ва олтин олиб кетилаётган икки зирҳли автомобилни тўхтатиб, етти нафар Украина фуқаросини қўлга олганини маълум қилди. Будапешт уларни пул ювишда гумон қилмоқда. Воқеа Венгрия ва Украина ўртасидаги сиёсий зиддиятни янада кучайтирди. Бу ҳақда “Reuters” хабар берди.

Венгрия Солиқ ва божхона бошқармаси маълумотига кўра, жорий йилнинг 5 март куни махсус антитеррор бўлинмалари операция ўтказиб, Австриядан Украинага йўл олган икки банк инкассация автомобилини тўхтатган. Транспортда жами 40 миллион доллар, 35 миллион евро ва 9 килограмм олтин бўлган.

Тарқатилган видеоларда қуролланган махсус кучлар автомобилларни ёқилғи шохобчасида тўхтатиб, ичидаги одамларни қўлга олаётгани акс этган. Улар орасида Украина махсус хизматларининг собиқ генерали ҳам борлиги айтилмоқда.

Украина Ташқи ишлар вазири Андрей Сибига эса бу ҳаракатни кескин қоралаган. У қўлга олинганлар давлат банки — “Ощадбанк” ходимлари эканини билдириб, Будапештни “одамларни гаровга олиш ва пулни тортиб олиш”да айблаган. Сибига бу ҳолатни “давлат терроризми ва рэкет” деб атаб, Европа Иттифоқини Венгрия ҳаракатларига ҳуқуқий баҳо беришга чақирган.

Адвокат ва Украина элчихонаси вакиллари ҳам улар билан учраша олмаган. Шу муносабат билан Киев ўз фуқароларига Венгрияга сафар қилишдан эҳтиёт бўлишни тавсия қилган.

Бу можаро икки давлат ўртасидаги энергия баҳси фонида юзага келмоқда. Венгрия ва Словакия Украина “Дружба” нефть қувури орқали нефть етказиб беришни атайлаб кечиктираётганини иддао қилмоқда. Киев эса инфратузилма Россия дрони ҳужумида зарар кўргани сабаб таъмир ишлари вақт талаб қилаётганини билдирмоқда.

Венгрия бош вазири Виктор Орбан бу масалада Киевни шантажда айблаб, нефть етказиб бериш қайта тикланмагунча барча имкониятлардан фойдаланишини айтган. Шу билан бирга, у Украинага ажратилиши керак бўлган Европа Иттифоқи маблағларини ҳам блоклаб келмоқда.

Украина томони эса банк ходимлари одатий инкассация операциясини бажараётганини таъкидлаб, уруш бошланганидан бери валюта ва банк металлари асосан қуруқлик орқали ташилаётганини эслатган.

Эслатиб ўтамиз, аввалроқ агар Киев Словакияга нефть транзитини тикламаса, мамлакат фавқулодда электр энергияси етказиб беришни тўхтатиши мумкинлиги айтилган эди.