7 давлат Ҳормузни очишга кўмаклашишга тайёрлигини эълон қилди

Буюк Британия, Франция, Германия, Италия, Нидерландия, Япония ва Канада Ҳормуз бўғозидаги вазият бўйича қўшма баёнот берди. Ҳужжат кеча, 19 март куни Британия ҳукумати сайтида эълон қилинди.

“Биз Эроннинг кўрфаздаги қуролсиз тижорат кемаларига, фуқаролик инфратузилмасига, жумладан, нефть-газ объектларига қилган сўнгги ҳужумларини, шунингдек, Эрон кучлари томонидан Ҳормуз бўғозининг амалда ёпиб қўйилишини кескин қоралаймиз.

Можаронинг кучайиб бораётганидан чуқур хавотирдамиз. Биз Эронни таҳдидларни, миналар ўрнатишни, учувчисиз аппаратлар ва ракеталар ёрдамидаги ҳужумларни, шунингдек, бўғозни тижорат кемалари қатнови учун тўсиб қўйишга қаратилган бошқа уринишларни зудлик билан тўхтатишга чақирамиз”, дейилади қўшма баёнотда.

Шунингдек, ушбу давлатлар Ҳормуз бўғозини блокададан чиқаришга кўмаклашишга тайёр эканликларини билдирган.

“Биз бўғоз орқали хавфсиз ўтишни таъминлаш бўйича тегишли саъй-ҳаракатларга ҳисса қўшишга тайёрлигимизни билдирамиз. Тайёргарлик жараёнида иштирок этаётган мамлакатларнинг интилишларини олқишлаймиз”, дея баёнот берди етти мамлакат.

Ушбу давлатлар расмийлари энергетика бозорларини барқарорлаштириш чораларини кўраётганликларини, жумладан, қазиб олиш ҳажмини ошириш мақсадида бир қатор ишлаб чиқарувчи мамлакатлар билан ҳамкорлик қилаётганликларини маълум қилган. Улар энг кўп зарар кўрган мамлакатларга, жумладан, БМТ ва халқаро молия институтлари орқали ёрдам кўрсатиш устида ишлашга ваъда берган.

Эслатиб ўтамиз, аввалроқ АҚШ Президенти Дональд Трамп давлатларни Ҳормуз бўғозини очишга ёрдамлашишга чақирган эди. Бироқ айрим мамлакатлар ҳарбий амалиётларда қатнашишдан бош тортди. Бунинг ортидан АҚШ Мудофаа вазири Пит Ҳегсет АҚШнинг Европадаги иттифоқчиларини ношукрликда айблади. Буюк Британия, Франция, Германия, Италия, Нидерландия, Япония ва Канаданинг қўшма баёноти АҚШнинг мазкур норозиликлари фонида янграмоқда.