Хориждан қанча ўзбекнинг ўлиги қайтди?

2024 йилда жами 483 нафар ўзбекистонликнинг жасади хориждан Ўзбекистонга олиб келинган. Бу ҳақда бугун, 17 январь куни Вазирлар Маҳкамаси ҳузуридаги Миграция агентлиги раҳбарияти иштирокида АОКАда бўлиб ўтаётган матбуот анжуманида маълум қилинди.

“Майитларни олиб келиш харажатлари давлатларга қараб ўзгаради. Масалан, Россиядан битта ўзбекистонликнинг жасадини олиб келиш 1000 АҚШ долларигача бўлган пулни талаб қилади. Англия давлати ва Ўзбекистон ўртасидаги майитларни олиб келиш харажати 4-5 минг АҚШ долларига яқинлашади. Агар Япония, Корея давлатлари бўлса, 9-10 минг АҚШ долларигача пул керак бўлади”, деди агентлик масъули.

Қўшимча қилинишича, бунда муҳожирнинг қонуний ёки ноқоқниний равишда хорижда бўлгани аҳамиятсиз. Миграция агентлигига мурожаат қилинган тақдирда улар ўзбекистонликларнинг жасадларини олиб келишга ёрдам беради.

Маълумот учун, 2022 йилда 518 нафар, 2021 йилда ҳам 500 дан ортиқ меҳнат фаолиятини олиб бораётган ўзбекистонликнинг жасади хориждан олиб келинган. Шунингдек, 2020 йилнинг 20 апрель куни Ташқи меҳнат миграсияси агентлиги томонидан Россия Федерасиясида турли бахтсиз ҳодисалар оқибатида вафот этган 17 нафар ўзбекистонликнинг жасадлари Ўзбекистонга олиб келинганди.