2020 yildan YOI tizimidagi bir qator tashkilotlar yopilishi mumkin

O‘zbekiston Yoshlar ittifoqining o‘tgan vaqt davomida o‘ziga yuklatilgan vazifani bajara olmagan bir qator tashkilotlari optimizatsiya qilinadi hamda tizimda mafkuraviy jihatdan o‘ziga o‘xshagan tashkilotlar bilan birlashtirib yuboriladi. 

Bu haqda YOI vakili Nodir Abduqodirov “Yoshlarda korrupsiyaga qarshi kurashish bo‘yicha faol dunyoqarash va mustahkam fuqarolik nuqtai nazarni shakllantirish” mavzusidagi matbuot anjumanida ma’lum qildi.

“Tizimda mafkuraviy jihatdan o‘ziga o‘xshagan tashkilotlarni birlashtirib yuborish va shu orqali byudjet mablag‘larini tejash — mantiqan to‘g‘ri deb hisoblaymiz. Yil yakuniga qadar o‘rganish ishlari yakunlanadi. 2020 yildan boshlab Yoshlar ittifoqi tizimidagi bir qator tashkilotlar yopilishi ehtimoli bor. Chunki o‘ziga yuklatilgan vazifani bajara olmayotgan tashkilotni saqlab o‘tirishga hojat yo‘q”, dedi Nodir Abduqodirov.

Ma’lum qilinishicha, Yoshlar ittifoqi Bosh prokuratura akademiyasi bilan hamkorlikda korrupsiyaga qarshi kurashishda yoshlarning faolligini oshirish, yosh davlat xizmatchilari hamda yosh rahbarlar o‘rtasida korrupsion muhitlarni barvaqt profilaktika qilish maqsadida “Korrupsiyasiz soha” nomli Yoshlar laboratoriyalarini tashkil etish rejalashtirilgan.