Ҳусниддин Алиқулов Жаҳон чемпионатини ўтказиб юбориши мумкин

Ўзбекистон миллий терма жамоаси ҳимоячиси, Туркиянинг “Ризеспор” клуби аъзоси Ҳусниддин Алиқуловнинг “Гёзтепе” билан ўйинда олган жароҳати жиддий бўлиб чиқди. Футболчи Жаҳон чемпионатини ўтказиб юбориши мумкин. Бу ҳақда клуб матбуот хизмати хабар берди.

Ҳусниддин Алиқулов жорий йилнинг 19 январь куни  “Гёзтепе” билан ўйинда жиддий жароҳат олиб, майдонни тарк этишга мажбур бўлган эди.

Ўтказилган текширув ва таҳлиллар натижасида Алиқуловнинг чап тиззасида ACL (олдинги кесишган боғ) йиртилиши, Patellar Subluxation (тизза панжаси ярим чиқиши) ва бунинг натижасида MPFL (тизза боғи) шикастланиши, шунингдек ички ва ташқи менискусларда йиртилиш, қон кетиши ва шишиш аниқланган. Шу сабабли операция қилиниши қарор қилинган. Алиқуловнинг майдонга қайтиш муддати тахминан 6–9 ой деб белгиланган.

Шу сабали ҳам ўзбекистонлик ҳимоячи жорий йилнинг ёзида бўлиб ўтадиган Жаҳон чемпионатини ўтказиб юбориши эҳтимоли жуда юқори.

Маълумот учун, Ҳусниддин Алиқулов жароҳати сабаб 2023 йил Қатарда бўлиб ўтган Осиё кубогини ҳам ўтказиб юборган эди.