Ҳусийлар Тель-Авивга баллистик ракета учирганини эълон қилди

Ямандаги ҳусийлар ҳаракати Исроил пойтахти Тель-Авивдаги Бен Гурион халқаро аэропортига “Фаластин-2” баллистик ракетаси билан ҳужум қилганини маълум қилди. Бу ҳақда ҳусийлар ҳарбий воизи Яҳё Сария телемурожаатида маълум қилди. 

Унинг сўзларига кўра, зарба Исроилнинг давом этаётган ҳужумлари ва Ғазо сектори блокадаси учун жавоб чоралари доирасида амалга оширилган. Сариянинг қайд этишича, зарбалар Исроил агрессияси тугамагунча давом этади.

Исроил армияси эса 18 июль куни кечқурун Ямандан учирилган ракета ҳаво ҳужумига қарши мудофаа тизимлари томонидан тутиб олинганини маълум қилганди.

Исроил оммавий ахборот воситаларининг хабар беришича, огоҳлантирувчи сиреналар чалингач, Тель-Авив аҳолиси бомба паноҳларидан бошпана топган, Бен Гурион аэропорти эса парвоз ва қўнишларни вақтинча тўхтатган.

Эслатиб ўтамиз, жорий ой бошида Исроил “Қора байроқ” операциясини бошлаб, унинг давомида Яманнинг учта портига, шунингдек, ҳуcийлар 2023 йилда қўлга киритган “Galaxy Leader” юк кемасига ҳужум қилганди.