Ҳусанов “МанСити”нинг бугунги ўйинини ўтказиб юбориши мумкин

Англия Премьер-лигасининг 8-тури доирасидаги “Манчестер Сити”нинг “Эвертон”га қарши бугун, 18 октябрь куни бўлиб ўтадиган ўйинида Родри ва Абдуқодир Ҳусанов майдонга тушмаслиги мумкин. Бу ҳақда “CityXtra” нашри хабар берди.

Испаниялик Родри “Брентфорд”га қарши ўйинда тиззасидан жароҳат олган ва шундан сўнг Испания терма жамоаси йиғинини ҳам ўтказиб юборган. Ҳозирда у гуруҳ машғулотларига қайтган, аммо тўлиқ тайёр эмас. Ўзбекистонлик Абдуқодир Ҳусанов эса жисмоний тайёргарликни тўлиқ якунламаган. У машғулот майдончасида аста-секин тикланмоқда, шунинг учун бош мураббий Пеп Гвардиола футболчилар билан таваккал қилмоқчи эмас.

Гвардиола ва тиббиёт штаби кейинги 48 соат давомида икки футболчини диққат билан кузатади. Ўйиндан олдинги матбуот анжумани уларнинг майдонга тушиш имконияти ҳақида қўшимча маълумот бериши кутилмоқда.

Иккала футболчининг йўқлиги тактик ўзгаришларга олиб келиши мумкин. Родри бўлмаган тақдирда ярим ҳимояни Нико Гонсалес бошқариши, Ҳусанов йўқлигида эса ўнг қанот ҳимоясида Матеус Нунес ёки Рико Льюис майдонга тушиши мумкин.

Эслатиб ўтамиз, Абдуқодир Ҳусанов 21 сентябрь куни “Арсенал”га қарши бўлиб ўтган (1:1) ўйинда оёғидан жароҳат олган эди. Ўзбекистонлик футболчи жорий мавсумда “Манчестер Сити” сафида жами 5 та ўйинда майдонга тушган.