Ҳоланд АҚШда сувенирлар учун 10 минг доллар сарфлади

Норвегия терма жамоаси ҳужумчиси Эрлинг Ҳоланд АҚШнинг Техас штати, Даллас шаҳридаги “Ёввойи Ғарб” мавзусидаги кийим-кечак ва сувенирлар дўконида қарийб 10 минг доллар сарфлади. Бу ҳақда TMZ хабар берди.

Қайд этилишича, Жаҳон чемпионатининг чорак финалида Англияга қўшимча бўлимларда 2:1 ҳисобида мағлуб бўлган Норвегия терма жамоаси душанба куни кечқурун Ослога қайтиб келган. Ҳоланд ижтимоий тармоқларда самолёт зиналаридан қўлида тўлдирилган енот ўйинчоғини кўтарган ҳолда тушаётган суратини ҳам эълон қилди.

Нашр маълумотига кўра, норвегиялик юлдуз ушбу ноодатий сувенирни Далласдаги ковбой услубидаги кийимлар ва эсдалик буюмлари сотиладиган дўкондан харид қилган. Дўкон эгасининг айтишича, Ҳоланд ва унинг жамоадошлари у ерда қарийб бир ярим соат вақт ўтказган.

Футболчилар ковбой шляпалари, енот терисидан тайёрланган шляпалар, этиклар, камарлар ва кўйлаклар харид қилишган. Шунингдек, уларга тўлдирилган олмахон ўйинчоқлари ҳам ёққан.

Маълум қилинишича, юмшоқ ҳайвон ўйинчоқларининг нархи 450 доллардан 750 долларгача бўлган. Манбага кўра, дўконда амалга оширилган барча харидлар учун тўловни Эрлинг Ҳоланднинг ўзи амалга оширган.