“Ҳизбуллоҳ” Исроилга “Катюша” ракеталари билан зарба берди

Ливандаги “Ҳизбуллоҳ” ҳаракати Юқори Жалиладаги Исроил ҳарбий базасига Ливан жанубидан ўнлаб “Катюша” ракеталари билан ҳужум қилди. Бу ҳақда “Ҳизбуллоҳ”нинг тегишли баёноти эълон қилинди.

“Ғазо секторидаги матонатли Фаластин халқини ҳамда уларнинг мардона ва муносиб қаршилигини қўллаб-қувватлаш мақсадида жума куни кечқурун соат 20:00 да ўнлаб “Катюша” ракеталари билан Заурдаги душман артиллерия позицияларига ҳужум қилинди", дейилади хабарда. 

Ўз навбатида, ЦАХАЛ Исроил шимолида 40 га яқин ракета учирилиши қайд этилганини маълум қилди. Аниқлик киритилишича, снарядларнинг бир қисми ушланган, қолганлари очиқ майдонларга тушган. Дастлабки маълумотларга кўра, ҳеч ким жабрланмаган.

Маълумот учун, Пентагон Яқин Шарққа у ерда жойлашган Америка қўшинлари хавфсизлигини таъминлаш учун қўшимча кучлар юборилганини тасдиқлади. Оқ уй Миллий хавфсизлик кенгашининг стратегик алоқалар бўйича координатори Жон Кирбининг маълум қилишича, Қўшма Штатлар Суриядаги Эрон элчихонасининг консуллик бўлимига Исроилнинг яқинда уюштирган зарбасига Теҳроннинг жавоб беришга тайёрлиги ҳақидаги баёнотлари туфайли Яқин Шарқдаги ҳарбий иштирокини ўзгартирган.

Кеча, 12 апрель куни “The Wall Street Journal” Эроннинг жавоб зарбаси яқин 24-48 соат ичида амалга оширилиши мумкинлигини ёзди. Нашрнинг қайд этишича, яҳудий давлати Эроннинг шимолдан ёки жанубдан тўғридан-тўғри ҳужум қилишига ҳозирлик кўрмоқда. 

Манбага кўра, Теҳрон ҳали якуний қарорга келмаган. “Axios” портали эса Эрон Ташқи ишлар вазири Ҳусайн Амир Абдуллоҳиён германиялик мавқедоши Анналена Бербокка Теҳрон кескинликнинг кучайишига олиб келмаслик учун Исроил зарбасига чекланган тарзда жавоб беришини айтганини ёзди.