Ҳиндистон Вашингтондан сотиб оладиган дронлардан Хитой билан чегарада фойдаланмоқчи – WSJ 

Ҳиндистон АҚШдан сотиб олинадиган MQ-9B дронидан Хитой билан чегарани қўриқлашда фойдаланмоқчи. Бу ҳақда кеча, 22 июнь куни “The Wall Street Journal” нашри хабар берди.

Айтилишича, ҳозирда Нью-Деҳлида Ҳиндистон ва Исроилда ишлаб чиқарилган ўнлаб дронлар мавжуд бўлиб, уларнинг кўпчилиги илғор сенсорлар ва камералар билан жиҳозланган. MQ-9B’дан эса разведка ва учувчисиз ҳаво воситаларига зарба беришда фойдаланилади.

Ҳиндистон расмийларининг билдиришича, дронлар Хитой қўшинлари ва қурол-яроғлари, артиллерия позициялари ва янги чегара инфратузилмаси жойлаштирилиши ҳақида маълумот йиғмоқда.

Эътиборли жиҳати шундаки, 2020 йилнинг май-июнь ойларида Ҳиндистон ва Хитой чегарасида жойлашган Ладах тоғли ҳудудида икки давлат ҳарбий хизматчилари ўртасида тўқнашувлар юз берган, оқибақтда икки томондан ҳам қурбон бўлган. Нью-Деҳли ва Пекин ҳудудга оғир артиллерия, танклар ва самолётлар олиб борган. Ҳарбий ва дипломатик даражадаги қатор музокаралардан сўнг томонлар қўшинларни тўқнашув чизиғидан босқичма-босқич олиб чиқишни бошлаган.

Маълумот учун, Ҳимолайда Хитой ва Ҳиндистон ўртасида демаркация қилинган чегаранинг йўқлиги ўнлаб йиллар давомида кескинлик манбаи бўлиб келган. 1959 йилда Нью-Деҳли Хитой томони Аруначал-Прадеш штатининг бир қисмини эгаллаб олганини эълон қилган. 1962 йилда эса қуролли тўқнашув бошланган ва натижада Ладах ва Аксай Чин вилоятларидаги 38 минг квадрат метрга яқин ҳудуд Хитой назоратига ўтган.